2020 йилнинг 7-декабрь куни Грин Метрик дунё университетлари рейтинги яъни “UI GreenMetric World University Ranking” халқаро рейтингининг натижалари эълон қилинди. “UI GreenMetric World University Ranking” — Яшил университетларнинг глобал рейтинги бўлиб, Индонезия университети ((УИ) томонидан 2010 йилда тузилган. Рейтинг асосчилари баъзи экологик муаммоларни ҳал қилишда илмий жамоатчилик эътиборини атроф-муҳитни барқарор ривожлантириш сиёсати зарурлигига жалб қилишга интилганлар. Асосий рейтинг мезонлари энергия истеъмолини тежаш, сув ресурсларидан оқилона фойдаланиш, чиқиндиларни сақлаш ва қайта ишлаш, экологик тоза транспорт воситаларидан фойдаланиш, кампусдаги яшил ҳудудларнинг майдони каби кўрсаткичларни ўз ичига олади. Рейтингда ушбу соҳада олиб борилаётган ўқув ва илмий фаолият кўрсаткичларига катта эътибор берилади.
Жорий йил ушбу рейтингга Ўзбекистондан Мирзо Улуғбек номидаги Ўзбекистон Миллий Университети ва Тошкент Ирригация ва қишлоқ хўжалиги институти қатнашди. 2020 йилда “UI GreenMetric World University Ranking” халқаро рейтинг натижаларига кўра, дунё бўйича 84 та мамлакатнингн 921 та университетлари орасидан Ўзбекистон Миллий Университети 353 ўринни Тошкент Ирригация ва қишлоқ хўжалиги институти эса 621 ўринни эгаллади. 2019 йилда мазкур рейтингга фақатгина Миллий университет қатнашиб, 780 та университет орасидан 374-ўринга сазовор бўлган эди. Бу йилги рейтинг кўрсаткичи 2019 йилга нисбатан 21 поғона юқорини кўрсатди. Ўзбекистон Миллий университет турли хил халқаро рейтингларда қатнашиб келмоқда.
Раима ШИРИНОВА
Ўзбекистон Миллий Университетининг халқаро алоқалар бўйича проректори
