Ушбу олтин медаль МДҲ ва Россиянинг энг етакчи тиббий генетика маркази ҳисобланадиган «Академик Н.П.Бочков номидаги тиббий генетик тадқиқотлар маркази» Федерал давлат бюджетли илмий муассасаси томонидан 2017 йилда таъсис этилган бўлиб, ушбу соҳага улкан ҳисса қўшган, ўзининг илмий янлигилигига эга бўлган олимга топширилади.
Таъкилаш жоизки, ушбу олтин медалга шу вақтгача фақатгина Россия олимлари сазовор бўлган бўлса, бу сафар МДҲ давлатлари орасида биринчилардан бўлиб ўзбек олимасига топширилиши катта шараф туйғусини уйғотади.
Академик Тамара Ўктамовна иммунология ва иммуногенетика, тиббий генетика соҳалари бўйича йирик мутахассис бўлиб, Республика ва ундан ташқаридаги илмий жамоаларда катта ҳурматга эга олима ҳисобланади.
Олима таҳрири остида Ўзбекистон Республикаси аҳолисининг иммун статуси харитаси, иммунологик ва генетик паспортлари ишлаб чиқилган.
Франция, Германия, Буюк Британия, Япония, Россия, Кирғизистон мамлакатлари олимлари билан биргаликда Марказий Осиё ва Кавказ орти халқларининг популяцион-генетик келиб чиқиши бўйича тадқиқотлар олиб борган.
Шунингдек, Марказий Осиёда биринчи маротаба Евроиттифоқнинг 7-рамка дастури доирасидаги «Марказий Осиё ва Европа популяцияларида преэклампциянинг генетик тадқиқотлари» номли халқаро грант ютиб, тиббий генетика соҳасини янада ривожлантирган.
Ҳозирги кунда академик бошчилигидаги жамоа тиббий генетика соҳасида орфан касалликлар, туғма нуқсонли патологияларни эрта аниқлашнинг генетик усулларини ишлаб чиқиш бўйича ўзларининг тадқиқотлар олиб боришмоқда. Фанлар академиясининг катта жамоаси номидан Тамара Ўктамовнани ушбу мукофот билан муборокбод этамиз!
