Кинематография агентлиги, “Ўзбекфильм” киноконцерни” ДУК ҳамда “Тожикфильм” ДМ томонидан “Юлдузлар шуъласи: Жомий ва Навоий” тарихий фильми суратга олинади.
Ушбу фильмда Жомий ва Навоийнинг ҳаёти ҳамда ижоди, икки буюк шоирнинг фалсафий қарашлари, халқчиллиги, дўстона муносабати ҳақида ҳикоя қилинади. Кинокартина сюжети “Иккинчи Ренессанс” даврини қамраб олади. Суратга олиш ишлари икки шоир ҳаётида муҳим ўрин тутган локацияларда олиб борилади.
Кинокартинада ўзбек ва тожик киноижодкорлари ҳамкорликда ишлайдилар. Яна бир эътиборли жиҳати, фильмни тасвирга олиш жараёнларида франциялик таниқли кинорежиссёр, сценарийнавис, продюсер ва актёр Люк Бессон ҳам иштирок этади.
Фильм сценарийси муаллифлари – Рустам Жабборов, Сафар Ҳақдоров, Юсуф Розиқов, Фирдавс Абдухаликов, постановкачи режиссёрлар – Юсуф Розиқов, Файзулло Файз.
Эслатиб ўтамиз, фильм яратиш бўйича меморандум Ўзбекистон Республикаси Кинематография агентлиги ва “Тожикфильм” киностудияси раҳбарияти ўртасида 2022 йилда ўтказилган ХIV Тошкент халқаро кинофестивали доирасида имзоланган эди.
