Ўзбекистон кино санъати музейи 1972 йил ташкил этилган бўлиб, жорий йил музейнинг 50 йиллиги нишонланмоқда. Кино санъати музейи 2005 йилгача музей-архив сифатида фаолият юритган.
Ушбу йилда Киночилар уйи биносида 2 минг кв.м майдонга эга экспозиция зали очилади. 2019 йил эса музей Кинематография агентлиги биносига кўчирилади.
2021 йил “Ипак йўли дурдонаси” Тошкент халқаро кинофестивалини ташкил этиш ва ўтказиш доирасида Киночилар уйи биносида Ўзбекистон кино санъати музейининг янги экспозицияси ва кўргазмалар зали ташкил этилди.
Музей архивида ўзбек киноси тарихига оид 40 мингдан ортиқ экспонатлар мавжуд. Музей таниқли киноижодкорларнинг кўплаб ноёб фотосуратлари билан безатилган.
Бугунги кунда музейда 30 мингдан ортиқ энг қимматли фото негативлар сақланмоқда. Шунингдек, 1920 йилдан 1980 йилгача ишлаб чиқарилган эксклюзив кинокамералар, афсонавий фильмлар ва сценарийларнинг асл нусхаларини ҳам учратиш мумкин. Музейнинг ҳозирги директори Гулнора Мухторова 2013 йилдан буён музейга раҳбарлик қилиб келмоқда. Ярим асрлик тарихга эга музей нафақат Ўзбекистон балки, халқаро доирада ҳам эътироф қилиниб келади.
Ҳозирда музей фондини ўзбек киноси тарихига оид турли экспонатлар билан янада бойитиш, рейтинги юқори турувчи халқаро музейлар сафига қўшиш, ўзбек киноси ҳақида ҳикоя қилувчи ягона масканга айлантириш бўйича ишлар амалга оширилмоқда.
Кинематография агентлиги Ахборот хизмати
