Хорижий, республикамиз етакчи олим ва мутахассислари, дипломатик корпус вакиллари, экспертлар, иқтисодчилар, ёш олимлар иштирок этган конференцияда Ўзбекистоннинг сўнгги йилларда босиб ўтган ривожланиш йўли, республикада амалга оширилаётган янгиланиш жараёнлари таҳлил қилинди. Сўз олганлар мустақиллик мамлакатимизда чинакам демократик парламентни шакллантиришнинг сиёсий-ҳуқуқий асосини яратганини, бугунги кунда халқ манфаатларини кўзлаб қонунлар қабул қилиш учун демократик миллий парламент шакллантирилиб, унинг давлат ҳокимияти органлари тизимидаги ўрни ва таъсири мустаҳкамланганини таъкидладилар.
Тадбирда Олий Мажлис Қонунчилик палатаси Спикерининг биринчи ўринбосари А.Саидов сўзга чиқди ва мустақиллик мамлакатимизда демократик миллий парламентнинг шаклланиши ва ривожланиши учун сиёсий-ҳуқуқий асос яратганини билдирди. Бундан 30 йил аввал Ўзбекистон халқи ўз мамлакатида адолатли жамият, эркин ва фаровон ҳаёт қуришни ўз олдига мақсад қилиб қўйганини айтиб, бу жараён ривожланишнинг қийин ва оғир йўлларида кечганини, ўзбек халқи бу йўлни матонат ва жасорат билан босиб ўтганини таъкидлади.
Қайд этилганидек, истиқлол йилларида Ўзбекистон Республикаси суверен давлат сифатида жаҳон ҳамжамиятида муносиб ўрин эгаллади. Ҳозирги кунда мамлакатимизда иқтисодий, маданий ва маънавий тикланишнинг муҳим жараёни рўй бермоқда. “Янги Ўзбекистон” ва “Учинчи Ренессанс” атамалари пайдо бўлиб, улар ҳам академик жамиятнинг кундалик ҳаётига кириб келган.Конференцияда 30 йил мобайнида 1079 та қонун қабул қилингани, уларнинг 869 таси амалда, 227 та халқаро шартнома ратификация қилингани айтилди.
Ҳаракатлар стратегиясининг таркибий қисми сифатида 73 та қонун қабул қилингани, биргина охирги беш йилда 300 дан ортиқ қонун, 4 та кодекс, 3 мингдан ортиқ Президент фармон ва қарорлари қабул қилингани таъкидланди.Конференцияда “Инсон манфаатлари – ҳамма нарсадан устун” тамойили асосида фуқароларнинг ижтимоий муаммоларини ҳал этиш, ҳуқуқ ва қонуний манфаатларини ҳимоя қилиш, жамиятда миллатлараро тотувлик ва диний бағрикенгликни таъминлаш бўйича Ўзбекистонда эришилаётган натижалар ҳамда истиқболдаги вазифалар юзасидан ўзаро фикр алмашилди.
Мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепцияси Конституциямизга киритилган тузатишлар Олий Мажлиснинг, сиёсий партияларнинг Қонунчилик палатасидаги фракциялари ваколатларини янада кенгайтиргани қайд этилди, деб хабар беради Олий Мажлис Қонунчилик палатаси матбуот хизмати.
