2014 йилда ташкил этилган «Sonneg Luxembourg S.A» компанияси улгуржи тўқимачилик маҳсулотлари савдосига ихтисослашган. Компания Европада алоҳида мижозларга сифатли ва арзон тўқимачилик маҳсулотлари етказиб берувчи сифатида ном қозонган. Бугунги кунда компания Люксембург орқали бутун Европа бўйлаб Ўзбекистондан турли-туман тўқимачилик маҳсулотларини экспорт қилиб келяпти.
«Sonneg Luxembourg S.A» мамлакатимизнинг «Uztex Group», «Elegant», «Fiber», «Tmt» корхоналари билан ўзаро алоқалар ўрнатган ҳолда уларнинг маҳсулотларини Буюк Британия, Германия, Испания, Франция, Люксембург, Полша, Чехия ва Италия бозорларига етказиб беряпти.
Диёр Ёқубовнинг айтишича, жорий йил бошидан буён унинг компанияси орқали Ўзбекистон бренди остидаги тайёр тўқимачилик маҳсулотлари Европа бозорларига қарийб 100 минг долларга экспорт қилинди ва йил охиригача бу кўрсаткич саккиз юз минг долларга етиши кутиляпти.
Тадбиркорнинг айтишича, «Европа бозорларида ўзбек маҳсулотларига харидор топиш муаммо эмас, энг асосий масала - Европа стандартларига мувофиқ етказиб беришни мунтазам равишда ташкил этишдир».
Унинг таъкидлашича, айрим экспортчилар европалик шерикларининг ишончини йўқотмоқда, бунга эса ҳамкорликни йўлга қўйиш жараёнида маҳсулот сифатига эътиборнинг камаяётгани сабаб бўлган.
Учрашув натижасида Ўзбекистон мустақиллигининг 30 йиллиги муносабати билан ўзбек тўқимачилари ва агросаноат мажмуаси ходимлари учун ўқув машғулотларини ташкил этиш, Люксембургда савдо уйи очиш ва ўзбек миллий тўқимачилик ва ипак маҳсулотлари кўргазмасини ташкил этиш бўйича келишувга эришилди, деб хабар беради «Дунё» АА.
