Унинг таъкидлашича, 2025 йил ЖСТга аъзо бўлиш жараёнида аниқ натижаларга йўналтирилган, ҳал қилувчи йил бўлди.
Хусусан, ЖСТга аъзо 34 та давлатдан 33 таси билан икки томонлама бозорга кириш музокаралари якунланди. Жараён доирасида 40 дан ортиқ музокара раунди ҳамда Ишчи гуруҳнинг 2 та йиғилиши ўтказилди, 200 дан зиёд ёзма саволларга жавоблар тақдим этилди.
Европа Иттифоқи, Хитой, Россия, Буюк Британия, Швейцария, Канада, Австралия каби йирик савдо ҳамкорлари билан келишувларга эришилди. Қайд этилишича, ҳозирда фақат битта икки томонлама музокара якунланиши кутилмоқда. Бу борада Тайвань назарда тутилган.
Шунингдек, кўп томонлама ва юқори даражадаги ҳамкорлик доирасида ЖСТ Бош директори билан учрашувлар ўтказилди, Нью-Йорк, Вашингтон ва Женева шаҳарларида муҳим халқаро тадбирларда иштирок этилди. Ўзбекистоннинг иқтисодий ислоҳотларига бағишланган 3 та халқаро конференция ташкил этилди.
Қонунчиликни мувофиқлаштириш доирасида эса ЖСТ талабларига мос равишда 30 та норматив-ҳуқуқий ҳужжат қабул қилинди.
2026 йил учун устувор вазифалар сифатида қолган битта икки томонлама музокарани якунлаш, кўп томонлама музокаралар ва Ишчи гуруҳ ҳисоботини тугатиш, қонунчиликни тўлиқ мувофиқлаштириш ҳамда Ўзбекистоннинг ЖСТга аъзо бўлиш жараёнини якунига етказиш белгиланган.
Қайд этилишича, 2025 йил Ўзбекистоннинг қоидаларга асосланган халқаро савдо тизимига қатъий содиқлигини, очиқлик ва шаффофлик тамойилларига таянишини яна бир бор намоён этди. Эришилган натижалар Президент Шавкат Мирзиёевнинг изчил қўллаб-қувватлаши самараси экани таъкидланди.
