Панама раҳбарияти БМТ Бош котиби Антониу Гутерришга АҚШ Президенти Дональд Трампнинг Панама каналига эгалик қилиш ва уни АҚШ назоратига қайтариш нияти ҳақидаги баёнотларини рад этишини билдирган мактуб йўллади. Бу ҳақда Лотин Америкаси мамлакати ташқи ишлар вазирлиги сайтида хабар берилди.
“Панама Президент Дональд Трампнинг инаугурация маросимидаги нутқи чоғида АҚШ Панама каналини қайтариб олишни ваъда қилган баёнотлари юзасидан мактуб йўллади. Панаманинг Нью-Йоркдаги БМТдаги элчиси Элой Альфаро де Альбанинг ташкилот Бош котиби Антониу Гутерришга йўллаган мактубида БМТ Низомига мувофиқ, давлатлар ўз муносабатларида ҳар қандай давлатнинг ҳудудий яхлитлиги ёки сиёсий мустақиллигига қарши куч ишлатиш таҳдиди ёки қўллашдан тийилиши кераклигини эслатди”, дейилади бошқарма баёнотида.
Трамп душанба куни АҚШ Конгрессининг марказий зали Ротундада – ўзининг инаугурация нутқида яна бир бор Панама каналини “қайтиб олиш” ниятини билдирди. Унинг таъкидлашича, канал назоратини Панамага қайтариш “ҳеч қачон берилмаслиги керак бўлган аҳмоқона совға”. Трампнинг фикрича, “Хитой Панама каналини назорат қиляпти”.
1914 йилда очилган Панама канали АҚШ томонидан қурилган ва назорат қилинган. 1977 йилда Торрихос-Картер шартномаси канални Панамага босқичма-босқич ўтказиб беришни назарда тутарди ва у 1999 йилда амалга ошди. Шартнома каналнинг бетарафлигини ва жаҳон савдосига очиқлигини кўзда тутган. Бугунги кунда у глобал иқтисодиёт учун муҳим йўналиш ва АҚШ манфаатларининг асосий объектларидан бири бўлиб қолмоқда, деб хабар беради tass.ru.
