Уч ака-ука Сабриддин, Руҳиддин, Муҳриддин Ориповлар йиғган маблағларига ўзларининг қишлоғидан кичикроқ бинодан хона олиб, мўъжазгина цех очишди. Қоғоз сочиқ, яъни салфетка маҳсулотлари ишлаб чиқаришни йўлга қўйишди. Йигитлар ўзларидан бошқа яна икки нафар ёшни ҳам иш билан таъминлади.
Албатта, цехни бунёд этишнинг ўзи яхши бўлгани йўқ. Хоналарни мослаштириш, ишлаб чиқариш учун шароитлар яратиш ва хориждан технология келтириш ҳамда бошқа юмушлар учун елиб-югуришди. Лекин бугун улар Хитойдан олиб келинган ускуналарни бошқаришни бинойидек уддалашяпти, шу билан бирга, яхшигина даромад ҳам олишяпти.
– Маҳсулотларимизни туманимиздаги ошхоналар олишади, пойтахтимиздаги «Ўрикзор», «Эко» бозорларига ҳам чиқаряпмиз, – дейди тадбиркор Руҳиддин Орипов. – Ишимиз ёмон эмас. Биз бизнесимизни бошлашда анча иккиланган эдик. Кўпчилик учун арзимаган бўлиб туюлган бу тадбиркорликнинг ўз ўрни бўлганидан бугун хурсандмиз. Битта елим қопда 40 та қадоқда маҳсулот бўлади. Ишимиз бароридан келса, бир кунда 30 қопни сотувга чиқарамиз.
Тадбиркорларнинг фаолиятини кузатамиз. Дастгоҳга жойлаштирилган қоғозлар ўрами худди лента мисоли айланиб, дастлаб гул босиш босқичидан ўтказилади, кейин махсус узунликда жойлаштирилиб, ўткир тиғли мослама билан кесилади ва компьютер кўмагида кичик, ўртача ва катта халтачаларга 50, 100, 200 донадан солинади. Шундан сўнг эса яна мослама орқали елим халтачалар тикилиб, сотувга чиқаришга тайёр бўлади.
Мавриди келганда бир жиҳатга эътибор қаратсак. Уч ака-укалар ҳам бугунги баъзи тенгдошлари қатори бирор ишни бошини тутмасдан юриши мумкин эди. Аммо улар ҳаётда ўз йўлини топиб, ўз бизнесларини йўлга қўйишди.
Энди эса бошқа режаларини ҳам амалга ошириш ниятида ҳаракат қилишмоқда. Банкдан кредит олиб, корхона фаолиятини кенгайтириб, намли салфеткалар, ҳожатхона қоғозлари ишлаб чиқаришни ҳам бошлашмоқчи.
Дилфуза Миробидова.
