Шу кунларда жамоалар таркибни аниқлаб, ўртоқлик учрашувлари ўтказяпти. Шу билан бирга, футбол мутахассислари қайси жамоа чемпион бўлиши мумкинлиги ҳақида ўз фикрларини, тахминларини ҳам билдирмоқда.
“Тоттенҳэм”нинг собиқ бош мураббийи, янги мавсумда “Рома”ни бошқаришга тайёргарлик кўраётган Жозе Моуриньо Франция миллий жамоасининг имкониятлари юқори эканлигини айтди.
“...Чемпионатда ким ғолиб бўлишини айтиш лозим бўлса, мен Францияни кўрсатган бўлардим. Чунки уларнинг таркиби фантастик даражада кучли, кучсиз чизиқнинг ўзи йўқ. Французлар ғолиб бўлишлари шарт. Акс ҳолда бу турнирни улар учун омадсиз ўтди, дея баҳолаш лозим бўлади”, деб ёзди у The Sun’даги колонкаси.
Лондоннинг “Арсенал” клуби собиқ бош мураббийи Арсен Венгернинг фикрича ҳам айни пайтда қитъадаги энг кучли жамоа Франция.
“Франция – суперфаворит. Бу сўзлар, ҳатто, жамоанинг кучини тўлиқ ифодалай олмайди. Франция – амалдаги жаҳон чемпиони. Жамоа таркибида Канте, Погба, Бензема, Гризманн, Коман, Жиру ва Дембеле бор. Таркибнинг ярмини ҳали айтмадим.
Дидье Дешам қўл остидаги захира ўриндиғида дунёнинг исталган жамоасида асосий таркибда ўйнай оладиган яна 11 нафар футболчи бор. Франция – чемпион, бу жамоа энди ўзининг энг чўққисига чиқади”, – дея Венгернинг сўзларини келтирмоқда Sky Sports.
Чемпионатда Франция гуруҳдан чиқиш учун Германия, Венгрия ва Португалия миллий жамоалари билан кураш олиб боради.
