Тадбирлар давомида вилоятлардаги хонадонларда етиштириб келинган жами 70 килограмм гиёҳвандлик ўсимликлари белгиланган тартибда йўқ қилинди.

Ички ишлар вазирлиги Тезкор-қидирув департаменти ҳамда унинг ҳудудий бўлинмалари ходимлари томонидан ўтказилган тезкор-қидирув тадбирлари натижасида бир қатор ҳолатлар аниқланган.

Жумладан, Андижон вилоятининг Олтинкўл туманида 1967 йилда туғилган фуқаронинг яшаш хонадонида 24 килограмм марихуана гиёҳвандлик моддаси сақлаб келинаётгани аниқланиб, процессуал тартибда расмийлаштириб олинди. Ҳолат юзасидан фуқарога нисбатан Жиноят кодексининг 273-моддаси 6-қисми «а» банди билан жиноят иши қўзғатилган.

Шунингдек, туманда яшовчи фермер хўжалиги иш бошқарувчиси 200 квадрат метр ер майдонига 520 туп каннабис гиёҳвандлик ўсимлигини экиб, парваришлагани ва плантация ташкил этгани аниқланган. Мазкур ҳолат юзасидан унга нисбатан Жиноят кодексининг 270-моддаси 2-қисми «в» банди билан жиноят иши қўзғатилган.

Избоскан туманида эса 1977 йилда туғилган фуқаронинг яшаш хонадонида 6 килограмм 100 грамм марихуана гиёҳвандлик моддаси сақлаб келинаётгани аниқланган. Ушбу ҳолат юзасидан ҳам Жиноят кодексининг 273-моддаси 6-қисми «а» банди билан жиноят иши қўзғатилган.

Тезкор-қидирув тадбирлари Самарқанд вилоятида ҳам ўтказилди. Самарқанд туманида 1981 йилда туғилган шахснинг яшаш хонадони томорқасида 41 туп каннабис гиёҳвандлик ўсимлиги экиб, парваришланаётгани аниқланган. Шунингдек, хонадонда 400 грамм марихуана гиёҳвандлик моддаси сақланаётгани маълум бўлган. Ҳолат юзасидан Жиноят кодексининг 270-моддаси 1-қисми билан жиноят иши қўзғатилган.

Назоратли парвозлар Бухоро вилоятида ҳам давом эттирилди. Бухоро туманида эр-хотин ўз яшаш ҳовлиси томорқасидаги ер майдонига 46 туп каннабис гиёҳвандлик ўсимлигини экиб, парваришлаб келаётгани аниқланган.

Бундан ташқари, 42 квадрат метр ер майдонида 53 туп каннабис гиёҳвандлик ўсимлигини етиштириб келаётган оила аниқланган. Мазкур ҳолат юзасидан фуқароларга нисбатан Жиноят кодексининг 273-моддаси 6-қисми «а» банди билан жиноят иши қўзғатилган.

Ҳудудларда таркибида гиёҳвандлик моддаси бўлган ўсимликлар етиштирилаётган майдонларни аниқлаш ва йўқ қилишга қаратилган «Қорадори-2026» тезкор-профилактик тадбирининг иккинчи босқичи давом эттирилмоқда.