Маълум қилинишича, Давлат хавфсизлик хизмати ходимлари Божхона ва ички ишлар органлари билан ҳамкорликда амалга оширган операция давомида 3 нафар шахснинг жиноий фаолиятига чек қўйилди.

Улардан икки нафари — Қўқон шаҳрида яшовчи 1994 ва 2002 йилларда туғилган шахслар бўлиб, учинчи гумонланувчи Қўштепа туманида истиқомат қилувчи 2001 йилда туғилган фуқаро ҳисобланади.

Терговга қадар текширувларда аниқланишича, ушбу шахслар “Жентра” русумли автомашинада Фарғона туманига бориб, қўшни республикадан ноқонуний олиб кирилган 11 650 дона “Регапен” номли кучли таъсир қилувчи дори воситаларини қабул қилиб олишган.

Шундан сўнг улар Қўқонга қайтиб кетаётган вақтда Учкўприк тумани ҳудудида тезкор гуруҳ томонидан тўхтатилган. Қонунбузарлар автомашинадаги дориларни ташлаб, қочишга уринган, бироқ бу режа амалга ошмаган.

Дастлабки маълумотларга кўра, улар ушбу дориларни Фарғона ва Қўқон шаҳарларида сотишни режалаштирган.

Ҳозирда мазкур ҳолат юзасидан жиноят иши қўзғатилган бўлиб, тергов ҳаракатлари давом этмоқда.