Мамлакатимиз элчихонаси вакиллари Туркия Президенти ҳузуридаги Халқ кутубхонасида ушбу кутубхона директори, проффессор А.Туғлу билан учрашув ўтказди.
Тадбирда Ўзбекистон халқ ёзувчиси Саид Аҳмаднинг яқинда элчихона ва ТЮРКСОЙ томонидан турк тилига таржима қилиниб, Анқарада чоп этилган сайланган ҳикоялар тўплами кутубхонага топширилди.
А.Туғлу ўзбек халқи меросини тарғиб этиш, ўзбек тилининг халқаро майдондаги обрўсини ошириш, қатағон қурбонлари хотирасини тиклаш ва абадийлаштириш масалаларида Туркия Президенти ҳузуридаги Халқ кутубхонаси Ўзбекистоннинг тегишли ташкилотлари билан амалий ҳамкорликка тайёр эканини билдирди, деб хабар беради «Дунё» АА.
Шунингдек суҳбатда, Туркияда ўзбек тили ва адабиётига қизиқиш йилдан-йилга ортиб бораётганлиги, ўзбек халқининг буюк меросига оид асарларни ўрганиш ҳам анча жадаллашгани таъкидланди.
Жумладан, кутубхона ходими, Туркиянинг Тракия университети ўқитувчиси, филология фанлари доктори Нурсел Динлер Комил Хоразмийнинг «Девони Комил» асарига оид тадқиқот ишларини олиб бораётганлиги, Алишер Навоий илмий меросига бағишланган докторлик ишини муваффақиятли ҳимоя қилган Н.Динлер ўзбек тилини ўрганиш ва Туркияда тарғиб қилиш бўйича самарали иш олиб бораётган ёш турк олимларидан бири эканлиги эътироф этилди.
