Ғарбий Африканинг Нигерия давлатида сариқ безгак эпидемияси ортидан вафот этганлар сони кундан-кун ортиб бормоқда.
Баучи штати соғлиқни сақлаш департаменти матбуот хизматининг маълум қилишича, яна саккиз киши сариқ безгак қурбонига айланган.
Юқумли касаллик Нигерия шимоли-шарқидаги Ганжува минтақасида қайд этилган.
Чивин билан юқадиган вирус туфайли юзага келадиган сариқ безгакдан ўлиш ҳолати — 10-40 фоизни ташкил қилади. Бу фавқулотда хавфли вирусли касаллик бўлиб, унинг оқибатида ички органлар – буйрак, жигар, талоқ, иликлар шикастланиши юзага келади, ҳар хил органларда ва мушакларда қон қуйилиши, қон кетиши содир бўлади.
Касаллик юқори тана ҳарорати, тиш милкларидан қон кетиши, қусиш, бурундан қон кетиши, жигар ва талоқнинг оғриқ билан катталашиши фонида жуда оғир кечади.
Эпидемияга даво топилмаган, бироқ 1937 йили вакцина ишлаб чиқилган. Бугунги кунда эмлаш касалликнинг ягона профилиактик чораси ҳисобланади.
