Маълумки, Президентимизнинг 2020 йил 10 ноябрдаги “Аҳолининг соғлом овқатланишини таъминлаш бўйича қўшимча чора-тадбирлар тўғрисида”ги қарорига биноан, болаларнинг 5 ёшгача бўлган даврда оптимал ривожланиши ва ўсишини таъминлаш мақсадида 2022 йил 1 январга қадар босқичма-босқич ҳомиладор ва туғруқдан кейинги даврдаги аёллар ҳамда 5 ёшгача болалари мавжуд оилаларга амалдаги штатлар доирасида алоҳида патронаж ҳамширасини бириктириш механизми жорий этилиши белгилланган.
ЮНИСЕФ томонидан топширилган “Бирламчи тизимда оналар ва болалар билан ишлаш бўйича патронаж ҳамширалари ишини ташкил этиш” амалий қўлланмаси ва “Оналар ҳамда болаларда хавф омилларини аниқлаш бўйича йўриқнома ва бериладиган тавсиялар” услубий кўрсатмаси айни шу йўналишдаги патронаж ҳамшираларнинг билим ва малакасини ошириш, фаолияти сифатини кўтаришга хизмат қилади.
— Аҳолига бирламчи тиббий-санитария ёрдамини кўрсатишда ушбу тўпламлар жуда самарали, — дейди ЮНИСЕФнинг Ўзбекистондаги ваколатхонаси раҳбари Мунир Мамедзаде. — Чунки уларда илғор халқаро тажрибалар таҳлил этилган бўлиб, тўпламлар ҳудуднинг ўзига хос жиҳатлари инобатга олинган ҳолда тайёрланган. Патронаж фуқаролар орасида болаларнинг тўғри парвариши, соғлом турмуш тарзини тарғиб қилиш, умуман, аҳоли саломатлигини сақлашда муҳим бўғин ҳисобланади. Ушбу қўлланмалар эса мамлакатингиздаги патронаж тизимининг сифатини янада яхшилаш учун хизмат қилишига ишонамиз. Ташкилотимиз томонидан Соғлиқни сақлаш вазирлигига қўлланмалар 50 минг нусхада топширилди.
Тадбир якунида мутахассислар мавзу юзасидан оммавий ахборот воситалари ҳамда иштирокчилар саволларига жавоб берди.
Соғлиқни сақлаш вазирлиги
Жамоатчилик билан алоқалар бўлими.
