Хусусан, Президентимизнинг 2023 йил 3 февралдаги “Ҳаво ҳарорати кескин совиб кетишининг иқтисодиётга салбий таъсирини камайтириш учун тадбиркорлик субъектларини қўллаб-қувватлаш чора-тадбирлари тўғрисида”ги қарорида худди шу омил туфайли қийинчиликларга дуч келган тадбиркорлик субъектларига нисбатан 2023 йил 1 апрелга қадар давлат фойдасига ундирувлар билан боғлиқ суд ҳужжатлари ва бошқа органлар ҳужжатларининг мажбурий ижроси тўхтатиб турилди.
Тадбиркорлик субъектларининг 2023 йил 1 январга нисбатан 1 февраль ҳолатига ошган (ҳосил бўлган) солиқ қарзини 2023 йил 1 мартдан 1 июлга қадар фоизларсиз, қўшимча шартлар қўймасдан ва таъминот талаб этмасдан тенг улушларда бўлиб-бўлиб тўлашга рухсат берилди. Солиқ қўмитасидан олиган маълумотларга кўра, ноқулай об-ҳаво натижасида тўлиқ қувватда ишлай олмаган 976 та корхонанинг 366,7 миллиард сўмлик солиқ қарзини тўлаш муддатлари узайтирилди.
Барча субъектларнинг муддатида тўланмаган солиқларига 1 апрелга қадар пеня ҳисобланиши тўхтатилди. Худди шу даврда ташқи савдо операциялари бўйича муддати ўтган дебитор қарздорлик учун хўжалик юритувчи субъектларга қўлланилган 1,7 триллион сўм жарималар ундирилмай турилди.
Тадбиркорлик субъектларининг айланма маблағларини кўпайтириш мақсадида 4,2 триллион сўм (ўтган йилнинг мос даврида 3,9 трлн.сўм) ҚҚС салбий фарқ суммалари қоплаб берилди.
Бундан ташқари, қайта ҳисобот топширган ёки мажбуриятини олдиндан бажарган субъектларнинг ҳисоб рақамига 603,4 миллиард сўм миқдоридаги маблағлари қайтарилди. Шунингдек, солиқ тўловчиларга 10,4 триллион сўмлик имтиёзлардан фойдаланишга кўмаклашилди.
Мазкур тадбирлар тадбиркорлик субъектлари фаоллиги ва бюджет тушумларига ижобий таъсир кўрсатиб, жорий йилнинг биринчи чорагида солиқ тушумлари 37,9 тиллион сўмни ташкил этди ёки ўтган йилнинг мос даврига нисбатан 3,4 триллион сўмга (10 фоизга) ўсди.
