Моҳиятида мардлик, жасурлик, эпчиллик, қатъиятлилик фазилатлари мужассам қадимий чавандозлик спорт ўйини — ўлоқ-кўпкари мусобақасида воҳамизнинг барча туманларидан, қўшни вилоятлардан келган юзлаб чавандоз-полвонлар иштирок этди, минглаб ишқибозлар кузатиб борди.
Мусобақа аввалида воҳанинг бир гуруҳ машҳур чавандозлари, улоқ ўйини ривожига ҳисса қўшиб келаётган фахрий полвонлар Сурхондарё вилояти ҳокимлигининг совринлари билан эъзозландилар.
Кўпкарида улоқни худди дошқозон сингари қайнаб турган майдондан олиб чиқиш ҳақиқий ғолибликдир. Лекин бундайин талотўпдан улоқни ажратиб олишнинг ўзи бўлмайди. Бунинг учун чавандозга яхши от, билак кучи ва улкан тажриба керак. Отинг учқур бўлса-ю, сенда чапдастлик етишмаса, ғолиб чиқишни орзу қилмасанг ҳам бўлаверади...
Бугунги кўпкарида кўплаб эпчил ва чапдаст чавандозлар улоқ айирди. Биринчи от қизириқлик Бобош чавандозга, иккинчи от шўрчилик Одил чобоғонга, туя қизириқлик Шаҳбоз полвонга насиб этди. Олтинсойлик Дилмурод полвон, шўрчилик Шерзод чобоғон ва бошқа яна кўплаб моҳир чавандозлар меҳнатига яраша пул мукофотлари ва қимматбаҳо совринлар билан рағбатлантирилди.
– Мана неча йиллардан буён от чоптираман, – дейди шўрчилик Одил чавандоз. – Овул ошиб, узоқ йўл босиб ҳудудларда ўтказиладиган кўпкариларга қатнашиб, ўз насибамизга яраша тақдирланаман. Шу вақт ичида кўпкари умримнинг мазмунига айланиб улгурди. Отга меҳрим бўлакча. Сурхон воҳасида азалдан йилқичилик яхши ривожланган, хонадонларда зотдор от боқиш кўпчилик от ихлосмандлари учун оддий ҳолдир. Болалигимдан уйимизда от бўлган. Шу туфайли отга меҳр қўйиб, ном қолдирдик. Вилоятларга борсак, “Одил чобоғон” келяпти, деб илиқ кутиб олади. Мен каби чавандозга бундан ортиқ эҳтиром керак эмас.
Кўпкари оддий кўнгилочар ўйин эмас, у эрни эр қиладиган, унда мардлик, жасурлик, эпчиллик ва довюракликни шакллантирадиган жиддий машғулот. Асосий масала совринга қўйилган қимматбаҳо нарса эмас, аксинча, баковулнинг адолати, номдор чавандознинг абжирлиги, ҳақиқат ғалаба қозониши, омад доим мардники бўлишидир. Бугун Ангор туманидаги катта улоқ-кўпкари мусобақаси ана шундай ўтди.
Айтиш керакки, тадбир давомида ҳарбий техника ва қурол-аслаҳалар, ҳарбий хизматчиларнинг кўргазмали жанговар чиқишлари, концерт дастурлари намойиш этилди, турли қизиқарли спорт мусобақалари ташкил этилди. Қолаверса, қиш фаслидаги баҳорий об-ҳаво байрам шукуҳига шукуҳ қўшди.
Тадбирда Сурхондарё вилояти ҳокими Тўра Боболов ва секторлар раҳбарлари иштирок этди.
