Қаҳрамонимиз “Vang‘ozi Humo Textile” ишлаб чиқариш корхонасига раҳбарлик қилиб келмоқда. “Ишбилармон аёл — 2021” кўрик-танловида 2-ўрин соҳибасига айланди.
Зиёли, ўзига тўқ хонадонга келин бўлиб тушган Шаҳноза асли тиббиёт соҳасида таҳсил олган. Тадбиркорликка қизиқиши эса тасодифан пайдо бўлган.
— Навоий вилоятининг мен келин бўлиб тушган жойида қандолатчилик дўкони йўқлигини кўрганимдан сўнг шу ерда қандолатчилик цехини очишга қарор қилдим, — дейди у. — Ишларни бошлаб олгач, аста-секин кенгайтирдик. Ҳозир цехда 8 нафар хотин-қиз ишлайди. Тўй-томошаларда дастурхонга тортиладиган барча турдаги пишириқларни тайёрлашни йўлга қўйганмиз.
Болалагидан тикувчи онасининг ишларини ўрганиб, ўзи ҳам бичиш-тикиш билан шуғулланган Шаҳноза бу ҳунарни ҳам давом эттиришни истади. Туман ҳокимлиги тадбиркорга Президент қарори билан ҳудудларда барпо этилаётган енгил конструкцияли иншоотлардан бирини лизинг асосида 5 йил муддатга олишни таклиф қилиб, унга ишонч билдирди. “Навоий барака чеварлари” МЧЖ 100 иш ўринли тикув биносини тадбиркорга 60 та тикув машинаси билан бирга тайёр ҳолда топширди.
Шу тариқа Шаҳноза 2020 йил сентябрь ойидан тикув корхонасида ишларни бошлаб юборди. “Ёшлар дафтари”, “Аёллар дафтари”га кирган 73 нафар хотин-қизни иш билан таъминлади. Бугунги кунда қўли гул чеварлар барча турдаги трикотаж маҳсулотлари ҳамда 16 хил махсус эркаклар кийимларини тикиб, харидорларга етказиб бермоқда. Корхонада ишлаб чиқарилган маҳсулотлар, асосан, Россияга экспорт қилинади.
— Тадбиркорлик аёллар учун осон соҳа эмас, қийинчиликлар бўлиб туради, — дейди Шаҳноза. — Корхонани ишга туширган илк вақтларимда аёлларни экспорт талабига жавоб берадиган даражада тикиш, замонавий машиналарда ишлашга қўлини ўргатгунча қийналганман. Шунинг учун бошида кўп маҳсулотларимиз яроқсизга чиққан. Бироқ ҳозир тикувчиларимнинг қўллари анча келишиб қолган. Биз, асосан, эркаклар кийимларини тикамиз. Бу борада тажрибам бўлмагани боис, устозим — “Primier textile”, “Sardoba textile” корхоналари раҳбари Мурод Пирмуҳаммедовдан кўп нарса ўргандим. Кийимларнинг дизайни, намуналарини ҳам у кишидан оламиз. Ундан чексиз миннатдорман.
Қаҳрамонимизнинг ўзи ҳам қандолатчилик ва тикувчилик соҳасида элликдан ортиқ шогирд чиқарган. Турмуш ўртоғи билан 3 фарзандни тарбиялаётган аёл оилада моддий қийинчилиги бўлмаса-да, меҳнат қилишни, одамларни иш билан таъминлашни истайди. Оиласи ҳам уни доим қўллаб-қувватлайди.
Табиатан қизиқувчан Шаҳноза тадбиркорликнинг турли йўналишларида ўзини синаб кўришдан чўчимайди. Ҳозир ҳовлисида 30 та товуғи бор. Кўрик-танловда танишган фермер аёлларга ҳавас қилиб, ўзи ҳам кўп тармоқли фермер хўжалиги ташкил этиш ниятида.
Ирода ТОШМАТОВА,
“Янги Ўзбекистон” мухбири
