Тошкент шаҳрининг Санкт-Петербург билан алоқалари серқирра эканлигига тўхталиб, савдо-сотиқ, саноат, таълим, маданият туризм, қурилиш, замонавий технологиялар соҳасидаги ҳамкорлик қатори қўшма инвестицион лойиҳаларни амалга ошириш, икки томон тадбиркорлари ўртасида муносабатларни мустаҳкамлаш, ўзаро самарали бўлган иқтисодий йўналишларни ривожлантириш муҳимлигига эътибор қаратди.
Санкт-Петербург Ташқи алоқалар бўйича қўмитаси раиси Евгений Григорев самимий қабул ва дўстона муҳит учун миннатдорлик билдириб, бу учрашув Тошкентда йирик ва нуфузли халқаро тадбир – “Иннопром. Марказий Осиё” халқаро кўргазмаси ўтказилаётган кунларда бўлиб ўтаётгани ҳам аҳамиятли эканлигини қайд этди. Ўзбек халқининг иккинчи жаҳон уруши йилларида кўрсатган мардлиги, жасорати, бағрикенглиги учун питерликлар юртимизни алоҳида қадрлашини билдирди. Турли соҳаларда ўзаро алоқаларни кенгайтириш ва тараққий эттиришда Тошкент шаҳри делегациясининг Сантк-Петербургга ташрифи аҳамиятли бўлишини таъкидлаб, ҳокимлик делегациясини Петербургга таклиф этди.
Санкт-Петербург шаҳри вице губернатори Кирилл Поляков йўл-транспорт соҳасида амалга оширилган ишлар, хусусан, аҳолини сифатли транспорт хизмати билан таъминлаш, тирбандликларнинг олдини олиш, соҳага инновацион технологияларни жорий этиш самаралари ҳақида маълумот берди.
“Радар ммс” илмий ишлаб чиқариш корхонаси” АЖ бош директори ўринбосари Сергей Нефедов эса “Ақлли шаҳар” лойиҳаси доирасидаги ишларга тўхталиб, бу йўналишда уларда камералар қатори дронлардан фойдаланиш йўлга қўйилганлиги йўл-ҳаракатини тартибга солиш, тирбандликларнинг олдини олиш ҳамда жиноятчиликнинг камайишига ҳисса қўшаётганлигини билдирди.
Учрашувда қурилиш ва коммунал хўжаликда қўлланилаётган янги техника ва технологиялар борасида ҳам фикр алмашилди, деб хабар беради Тошкент шаҳар ҳокимлиги матбуот хизмати.
