Аввалроқ, Янгиҳаёт туманида ичида одамлар бўлган лифт пастга тезликда тушиб кетгани ҳақида хабар берилганди.
Саноат хавфсизлиги давлат қўмитаси ахборот хизматининг маълум қилишича, воқеа Тошкент шаҳри, Янги ҳаёт тумани, “Янги Дархон” МФЙда жойлашган 17-сонли 16 қаватли кўп хонадонли уйда содир бўлган.
Мазкур уй “Land hause” МЧЖ томонидан 2023 йил апрель ойида фойдаланишга топширилган. Юк кўтариш қуввати 1000 кг бўлган лифт қурилмаси Туркия давлатининг “Axtem asansor” корхонаси томонидан 2022 йилда ишлаб чиқарилган.
Таъкидланишича, лифт қурилмаси 16 қаватдан 1 қават томон ҳаракатланиб келаётиб, тўхташ лозим бўлган қаватга яқинлашган пайтда кабинани секинлатувчи (датчик замедления) қурилмаси носозлиги сабабли тезлик камаймаган.
1-қаватга яқинлашганда лифтнинг автоматик тормоз тизими ишга тушиб тўхтагани ва тезлик камаймагани туфайли шахтада ўрнатилган буфер қисмига келиб урилгани тахмин қилинмоқда.
Лифт тўхтагандан сўнг мутахассислар томонидан эшик очилди. Лифтдан чиқариб олинган 11 кишининг 3 нафари турли синишлар билан шифохонага ётқизилди.
“Ҳозирда, Тоғ-кон, геология ва саноат хавфсизлигини назорат қилиш инспекцияси мутахассислари томонидан мавзедаги кўп қаватли уйлар лифтлари навбатдан ташқари техник кўрикдан ўтказилмоқда”, дейилади хабарда.
