Маълум қилинишича, Давлат хавфсизлик хизмати Тошкент вилояти бошқармаси ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбир давомида мазкур қонунга хилоф ҳаракатнинг олди олинган.

Терговга қадар текширув материалларига кўра, Тошкент шаҳрида яшовчи, 1979 йилда туғилган шахс тадбиркорлик фаолиятини бошламоқчи бўлган фуқаронинг ишончига кириб, Янгийўл тумани ҳудудидаги давлат захираси ҳисобланган 1,5 гектар ер майдонини архитектура ва кадастр соҳасида ишловчи таниш мансабдорлар орқали унинг номига расмийлаштириб беришни ваъда қилган.

Эвазига у 750 минг АҚШ доллари талаб қилган. Тезкор тадбир вақтида мазкур шахс сўралган маблағнинг бир қисми — 20 минг АҚШ долларини олган пайтда ашёвий далиллар билан ушланган.

Ҳозирда мазкур ҳолат юзасидан жиноят иши қўзғатилган бўлиб, тергов ҳаракатлари олиб борилмоқда.