«15 дақиқалик шаҳар» концепциясини амалга ошириш доирасида Тошкент шаҳар ҳокимлиги ва «2GIS» компанияси ўртасида ҳамкорлик меморандуми имзоланди.
Ҳужжатга мувофиқ, 2gis.uz электрон харитасида пойтахтнинг 585 та маҳалласидаги бўш иш ўринлари тўғрисидаги маълумотларни жойлаштириш режалаштирилган.
Бу орқали фуқаролар ўз яшаш жойига яқин ҳудудлардаги бўш иш ўринларини топиши, таклиф этилаётган иш ҳақи миқдори ва малака талаблари билан танишиши ҳамда ўзига мос ишни танлаши мумкин бўлади.
Лойиҳа иш қидириш жараёнини соддалаштириш, вақтни тежаш ва ишга бориш учун сарфланадиган транспорт харажатларини камайтиришга қаратилган. Бу эса фуқароларнинг даромадларини оширишга ҳам хизмат қилиши мумкин.
Ҳозирда лойиҳа Чилонзор туманидаги барча маҳаллаларда синов тариқасида амалга оширилмоқда. 2gis.uz сайтида дастлабки мавжуд бўш иш ўринлари ҳақидаги маълумотлар жойлаштирилган.
Тошкент шаҳар ҳокимлиги бошқа компаниялар билан ҳам шу каби лойиҳаларни амалга ошириш бўйича ҳамкорликка очиқ эканини билдирган.
