АҚШ Президенти Дональд Трамп Қўшма Штатлар Украинага қўшимча хавфсизлик кафолатларини таклиф қилмаслигини айтди. “Мен мавжуд бўлганидан ортиқ хавфсизлик кафолатларини бермайман. Буни Европага топширамиз... Лекин биз, албатта, ҳаммаси яхши бўлишига ишонч ҳосил қиламиз”, деди Трамп 26 февраль, чоршанба куни Вазирлар Маҳкамасининг биринчи йиғилишида. Вашингтон, хусусан, Европа тинчликпарвар кучлари Украинага киритилса, Европани қўллаб-қувватлаши мумкин.
Оқ уй раҳбари Украинадаги урушни тўхтата олишига ишонч билдирди. Унинг айтишича, Россия томони тинчликка эришиш учун музокараларда ён беришга мажбур бўлади. “Биз ҳар икки томон учун ҳам фойдали бўлган келишувга эришиш учун қўлимиздан келганини қиламиз”, деди Америка етакчиси журналистлар билан суҳбат чоғида. Трамп келишув “Украина учун яхши бўлишини” учун ҳаракат қилишига ишонтирди. Унинг сўзларига кўра, АҚШ Украинага бой берилган ҳудудларнинг бир қисмини қайтариб олишда ёрдам беришга ҳаракат қилади, гарчи бу қийин бўлса-да.
Бироқ, АҚШ Президенти Украина “НАТО ҳақида унутиши” кераклигини таъкидлади. Унинг фикрича, уруш айнан Украинанинг Шимолий Атлантика альянсига аъзолиги масаласи туфайли бошланган, деб хабар беради dw.com.
