Дастлабки натижаларга кўра, овозларнинг 98 фоиздан ортиғи санаб чиқилган ҳолда “Tisza” партияси 138 ўринни қўлга киритмоқда. Орбаннинг “Fidesz” партияси 55 ўрин билан чекланиб қолган, ўта ўнгчи “Our Homeland” партияси эса 6 ўрин олган.

Маълум қилинишича, сайловларда иштирок этганлар сони рекорд даражага — 79,5 фоизга етган. Бу Венгрия демократик тарихидаги энг юқори кўрсаткичлардан бири ҳисобланади.

Мадяр икки йил давомида мамлакат бўйлаб фаол кампания олиб бориб, коррупция ва таниш-билишчиликдан чарчаган аҳолини ўз атрофига бирлаштирган. У таълим ва соғлиқни сақлаш тизимларини ислоҳ қилиш, суд мустақиллигини тиклаш ҳамда коррупцияга қарши курашни кучайтиришни ваъда қилган.

Сайлов натижаларига кўра, унинг партияси конституцияга ўзгартиш киритиш учун зарур бўлган икки учдан бир қисми — 133 ўриндан ҳам кўпроқ мандатга эга бўлиши мумкин.

Маълумотларга кўра, Виктор Орбан рақиби ғалабасини тан олиб, Петер Мадярни табриклаган. У сайлов натижаларини “оғир ва аламли” деб баҳолаб, тарафдорларига миннатдорлик билдирган.