Наманган вилояти прокуратураси органлари томонидан “Яшил макон” умуммиллий лойиҳаси доирасида назорат тадбирлари ўтказиб келинмоқда. Хусусан, 2023 йилнинг биринчи ярми учун мўлжалланган режага кўра мазкур лойиҳа доирасида 2022 йилда қилинган ишлар ўрганилди.
Назорат гуруҳлари кўчат экилишини ўрганганида бир қатор қонунбузилишларни аниқлади. Жумладан, ҳудудларда белгиланган кўчат экиш режаси ерларга номувофиқ тақсимланган, кўчат ўрнига терак, тол, атиргул қаламчалари экилиб, режа хўжакўрсинга бажарилган.
Вилоят прокуратураси томонидан 2022 йил 20 октябрдан 1 декабргача долзарб қирқ кунликда мактаб, боғча ва соғлиқни сақлаш муассасаларида экилган кўчатларнинг ҳаққонийлиги таҳлил қилинганида, 375,6 мингта кўчат қўшиб ёзилгани аниқланди. Масалан, Наманган туманидаги таълим муассасаларида 2900 та дарахт экиш режалаштирилган, ҳақиқатда эса 1900 та кўчат экилган.
Туман экология ва атроф-муҳитни муҳофаза қилиш бўлими томонидан биргина 32-мактабнинг 0,55 гектар ерига 80 минг дона терак қаламчаси қадалган.
Қаламчаларнинг зич экилиши агротехник тадбирлар ўтказилишига имкон бермайди. Бу эса қаламчаларнинг касалланиши ва сифатли кўчат бермаслигига олиб келган.
Шунингдек, Наманган тумани халқ таълими бўлими “Мусаффо янги аср” ва “Давр янги ҳаёт” МЧЖлар билан тузилган электрон шартномалар асосида олинган 45 млн сўмлик, туман ободонлаштириш бошқармаси “Идеал мега траде повар” МЧЖ билан тузилган шартнома асосида олинган 17 млн сўмлик терак кўчатларини экмаган, шу тариқа давлатнинг 62 млн сўм маблағи талон-торож қилинган.
Ёзишича, мазкур ҳолатлар юзасидан жиноят иши қўзғатилиб, жазо муқаррарлиги таъминланди. Алоҳида қайд этиш жоизки, вилоят прокуратураси ташаббуси билан бу соҳани назорат қилишда фойдаланиш учун манзарали, мевали дарахт ва буталарни экиш тартиби, механизми ҳамда агротехник тадбирлари юзасидан тўплам чиқарилди.
