Маълум қилинишича, Давлат хавфсизлик хизмати ҳамда ички ишлар органлари ҳамкорлигида икки алоҳида ҳолат аниқланган.

Биринчи ҳолатда Қўшкўпир туманида яшовчи, муқаддам судланган шахс Урганч тумани ҳудудида тўхтатилиб текширилганда, унинг ёнидан 4 кг 407 грамм «опий» гиёҳвандлик воситаси топилиб, процессуал тартибда расмийлаштириб олинди.

Иккинчи ҳолатда эса «Беруний–Урганч» йўналишида ҳаракатланаётган «Lacetti» автомашинаси Урганч туманидаги «Чолиш» ЙПХ масканида тўхтатилди. Текширув давомида автоуловда бўлган яна бир шахсдан 4 кг 541 грамм «опий» аниқланиб, ашёвий далил сифатида олинди.

Тергов маълумотларига кўра, ҳар икки ҳолатда ҳам ушбу гиёҳвандлик воситалари Афғонистондан контрабанда йўли билан олиб келинган бўлиб, уларни Хоразм вилоятида сотиш орқали даромад топиш режалаштирилган.

Ҳозирда гумонланувчиларга нисбатан жиноят иши қўзғатилиб, «қамоқ» эҳтиёт чораси қўлланилган. Тергов ҳаракатлари давом этмоқда.

Мутахассислар таъкидлашича, гиёҳвандлик воситалари савдосига қарши курашишда жамоатчиликнинг фаоллиги муҳим аҳамиятга эга.