Хабарда айтилишича, Россия кинокомпаниялари ва телеканалларининг ижодий гуруҳлари Ўзбекистонга Наврўз байрами билан боғлиқ ўзига хос маросимларни суратга олиш, шунингдек, «Янги Ўзбекистон» ҳақида ҳужжатли фильмлар тайёрлаш учун етиб келган. Шу кунларда суратга олиш ишлари Ўзбекистоннинг турли ҳудудларида олиб борилмоқда.
«Россия-1» телеканалининг суратга олиш гуруҳи локациялар ва спикерларни излаб Тошкент, Самарқанд ва Бухорога ташриф буюришган. Сюжетлар «Россия-1» телеканали эфирида куни кеча Дмитрий Киселёвнинг «Вести недели» дастури орқали намойиш этилган.
«Ёрқин, қуёшли ва ниҳоятда самимий Ўзбекистон илк сонияларданоқ юракларни забт этди. Бизни ҳар бир шаҳар ва қишлоқда энг азиз меҳмонлар каби кутиб олишмоқда. Чин қалбдан, чин юракдан! Тўғри тушунинг, мен буни бошқа таърифлашнинг иложини тополмадим. Бундай муомала бу ерда эътиқод шакли, турмуш тарзидан келиб чиқади. Биз Ўзбекистонни айнан шундай – очиқкўнгил, меҳмондўст ва янгиланган, аммо кўп асрлик анъаналарига содиқ қолган юрт сифатида кўрсатишга ҳаракат қиламиз», – дейди «Россия-1» телеканали мухбири Ольга Армякова.
Шунингдек, «Мастерская» кинокомпаниясининг суратга олиш гуруҳи Наврўз байрами ҳақида фильм суратга олиш учун тўғри Бойсунга йўл олган. Бу кино гуруҳи раҳбари Саида Медведеванинг Ўзбекистон ҳақидаги биринчи фильми эмас. Бундан бир неча йил «Россия-2» телеканалида унинг «Ўзбекистон – қумликлар жавоҳири», «Қорақалпоғистон – вақт қумлари оралаб» ва бошқа фильмлари муваффақиятли намойиш этилган. Мазкур фильмлар ЭОАВМА билан ҳамкорликда ишланган. Бугун эса «Ўзбекистон. Янгиланаётган тарих» номли янги фильм суратга олинмоқда. Фильм Мустақилликнинг 30 йиллигига бағишланади.
«Шу ўринда таъкидлаб ўтиш жоизки, россиялик ҳамкорлар билан лойиҳаларимиз Бутунжаҳон жамиятининг IV халқаро Конгрессида ‘Ўзбеккино’ Миллий агентлиги ва Россия киноижодкорлари ўртасида тузилган шартномалар ва меморандумларга мувофиқ амалга оширилмоқда. Ҳозирги кунда агентлик яна бир қатор етакчи хорижий телеканаллар ва кинокомпаниялар билан ҳам қўшма лойиҳаларни имзолаш босқичида турибди», – дейди «Ўзбеккино» МА Бош директори Фирдавс Абдухолиқов.
