Ғарбий Австралия пойтахти Перт шаҳрида ўрмон ёнғини бошлангани ортидан минглаб одамлардан уйларини тарк этиш сўралган.
Тахминан 23 минг гектарга яқин ҳудуд вайрон бўлди. Камида 73 та уйнинг яроқсиз ҳолга келгани айтилмоқда.
Ғарбий Австралия бош вазири Марк Макгоуэнга кўра, вазият ёмонлашмоқда, кучли шамол келиши кутилмоқда. Шу боисдан одамларга ўз ҳаётини қутқариш учун ҳаракат қилиш лозимлигини таъкидлаган.
Ёнғиннинг қандай келиб чиққанлиги номаълум. Қурбонлар қайд этилмаган.
Мазкур шаҳарда бир кишида Covid-19 тести позитив чиққанлиги сабабли 2 миллион кишига 5 кунлик карантин чораси жорий этилган эди.
Ёнғинни назорат остига олиш учун 250 ўт ўчирувчи жалб этилган.
Австралияда 2019 йил сентябрь ойида бошланган ва 2020 йилнинг мартига қадар давом этган даҳшатли ўрмон ёнғинида 18 миллион гектар майдон кулга айланган эди. Мазкур ёнғин Австралия тарихида «қора ёз» номини олган. Ёнғин давомида 445 киши ҳаётдан кўз юмган, 3500 уй, 5 852 бино вайронага айланган, кўплаб жониворлар ҳаётини йўқотган эди.
