Таъкидланганидек, ҳужжат жамоат хавфсизлигини таъминлаш, фуқаролар ва ташкилотларнинг мол-мулкини ҳимоя қилиш ҳамда қўриқлаш фаолияти соҳасидаги давлат сиёсатини замонавий талабларга мослаштиришга қаратилган.

Қонун билан Маъмурий жавобгарлик тўғрисидаги кодекс, шунингдек «Ички ишлар органлари тўғрисида», «Қўриқлаш фаолияти тўғрисида» ҳамда «Лицензиялаш, рухсат бериш ва хабардор қилиш тартиб-таомиллари тўғрисида»ги қонунларга тегишли ўзгартириш ва қўшимчалар киритилмоқда.

Хусусан, жамоат жойларида тамаки маҳсулотини истеъмол қилиш, ноқонуний ов қилиш, дарахтларни кесиш ва бошқа экологик қоидабузарликларни кўриб чиқиш ваколати Ички ишлар вазирлиги ҳузуридаги Қўриқлаш департаменти масъул ходимларига берилади.

Шунингдек, қўриқлашнинг техник воситаларини лойиҳалаштириш ва уларга хизмат кўрсатиш бўйича рухсатнома бериш ваколати Ички ишлар вазирлигига ўтказилиб, тадбиркорлик субъектлари учун хабардор қилиш тартиби жорий этилиши назарда тутилган.

Муҳокама давомида мазкур қонун жамоат хавфсизлигини мустаҳкамлаш, аҳоли тинчлигини таъминлаш ҳамда «Инсон қадри – олий қадрият» тамойилини амалда рўёбга чиқаришга хизмат қилиши таъкидланди.

Сенаторлар фикрича, ҳужжатда хавфсизликни таъминлашда жазолашдан кўра профилактикага устувор аҳамият берилиб, жамоат тартиби, профилактика ва қўриқлаш фаолиятини ягона тизим сифатида самарали ташкил этиш кўзда тутилган.

Ялпи мажлис якунида Қонун сенаторлар томонидан маъқулланди.