Барои сохтмони шаҳри нав ҳудуди дорои масоҳати 5 ҳазору 200 гектар интихоб шудааст, ки дар байни шоҳроҳи автомобилии А-378 «Самарқанд — Ғузор» ва шоҳроҳи 4Р-79, ки ба самти Шаҳрисабз мебарад, ҷойгир мебошад. Ин қитъа аз заминҳои биёбонӣ ва чарогоҳҳои истифоданашаванда иборат буда, сифати хокаш паст аст. Нақшаи пешакии генералии шаҳр барои 500 ҳазор нафар аҳолӣ пешбинӣ шудааст.
Сарвари давлат таъкид кард, ки ҳангоми банақшагирии шаҳри нав бояд онро ҳамчун маркази бузурге тарҳрезӣ намуд, ки дар оянда барои 1 миллион нафар аҳолӣ пешбинӣ шуда, ба тавсеаи муосири шаҳри Қаршӣ табдил ёбад.
Дар назар аст, ки ҳокимияти вилоят ва дигар муассисаҳои давлатӣ ба ин ҷо кӯчонида шаванд. Дар шаҳр қасри конгрессҳо, толорҳои консертӣ ва меҳмонхонаҳо бунёд гардида, марказе ташкил карда мешавад, ки барои баргузории ҳамоишҳои бузурги байналмилалӣ, монанди чорабиниҳое, ки дар Самарқанду Бухоро баргузор мешаванд, имконият фароҳам меорад.
Шабакаи нақлиётӣ бояд робитаи қулайи шаҳрро бо дигар ҳудудҳо таъмин намояд. Президент зарурати ба роҳ мондани нақлиёти ҷамъиятии барқӣ ва дар ҳолати зарурӣ метрои рӯизаминиро таъкид кард. Ин воситаҳои нақлиёт фурудгоҳ ва вокзали роҳи оҳанро бо шаҳри нав мепайванданд.
Дар ҷараёни муаррифӣ инчунин лоиҳаи маҷмааи сайёҳӣ дар соҳили канали магистралии Қаршӣ баррасӣ гардид. Барои таъсиси минтақаи сайёҳии секилометра 235 гектар замин ҷудо карда шудааст. Лоиҳа дар чор марҳила амалӣ хоҳад шуд. Дар марҳилаи аввал дар ҳудуди 30 гектар шаҳраки ҳунармандон сохта шуда, минтақаи сайёҳӣ ташкил карда мешавад.
Дар таркиби маҷмаа сохтмони меҳмонхона, тарабхона ва мағозаҳо, осорхона, боғи обӣ, майдончаҳои бозии кӯдакон, инчунин бунёди кӯли сунъӣ, ки дар он одамон метавонанд бо заврақ сайру гашт кунанд, пешбинӣ шудааст.
Президенти кишвар ба масъулон супориш дод, ки нақшаи генералии шаҳри нав ва нақшаи муфассали рушди маҷмааи сайёҳиро бо ҷалби ширкатҳои пешрафтаи хориҷии лоиҳакашӣ ва меъморӣ ҳамаҷониба таҳия намоянд. Таъкид гардид, ки дар асоси лоиҳаҳо бояд принсипҳои амният, роҳатӣ, дастрасӣ ва «шаҳри ҳушманд» қарор дода шаванд.
