Дар Кобул хайати вакилони Ӯзбекистон бо муовини Сарвазир мулло Абдулғанӣ Бародар, иҷрокунандаи вазифаи вазири корҳои хориҷӣ Амирхон Муттакӣ, иҷрокунандаи вазифаи вазири мудофиа мулло Яъқуб Муҷоҳид, дигар аъзоёни ҳукумати муваққатӣ ва намояндагони сохторҳои иқтисодӣ вохӯрд.
Зимни мулоқот масъалаҳои тавсеаи равобити тиҷоративу иқтисодии дуҷониба, афзоиши ҳаҷми ҳамлу нақли молҳои гуногун, аз ҷумла транзит тавассути қаламрави Афғонистон баррасӣ шуданд.
Масъалаҳои татбиқи лоиҳаҳои муҳими нақлиётию энергетикӣ, аз ҷумла сохтмони роҳи оҳани "Тирмиз – Мазори Шариф – Кобул – Пешовар" ва кашидани хати барқ дар масири «Сурхон – Пули Хумрӣ» алоҳида баррасӣ шуданд.
Ҷонибҳо зарурати зудтар гузаштан ба марҳилаи амалии корро таъкид намуда, омодагии худро барои идомаи муколамаи созанда оид ба тамоми масъалаҳои рӯзномаи дуҷониба тасдиқ карданд.
Дар мулоқот зарурати эҳтиром ва ҳимояи ҳуқуқи занон, таъмини дастрасии духтарон ба таҳсил дар Афғонистон, ҳамчунин омода кардани кадрҳои афғон дар заминаи Маркази таълимии Тирмиз таъкид шуд.
Дар доираи муколама ба масъалаҳои ҳамкорӣ дар соҳаи обу энергетика таваҷҷуҳи махсус зоҳир гардид.
Музокирот дар рӯҳияи ҳусни тафоҳум ва хоҳиши ҷонибҳо ҷиҳати густариши минбаъдаи ҳамкориҳои дуҷониба аз рӯи масъалаҳои баррасишуда сурат гирифт, хабар медиҳад хидмати матбуоти Вазорати корҳои хориҷии Ҷумҳурии Ӯзбекистон.
