Солҳои охир дар кишвари мо корҳо оид ба ислоҳоти низоми хоҷагии об, навсосозии инфрасохтори обёрӣ ва истифодаи оқилонаи захираҳои об пайгирона идома доранд.
Мега-лоиҳае, ки дар вилояти Сурхондарё бо арзиши 287 миллион доллар амалӣ мешавад, яке аз дастовардҳои бузург дар ин самт ба ҳисоб меравад.
Дар доираи ин ташаббус солҳои охир корҳои бузурги сохтмонӣ ва насбкунӣ анҷом дода шуданд. Бо шарофати татбиқи технологияҳои муосир, имрӯз оби нӯшокии дорои моддаҳои минералӣ бетаъхир ва мунтазам ба даҳ ноҳияи вилоят ва шаҳри Тирмиз расонида мешавад.
Ҳашт-нуҳ сол пеш сатҳи фарогирии аҳолӣ бо таъминоти марказонидашудаи оби нӯшокӣ дар Сурхондарё 47 фоизро ташкил медод. Имрӯз ин нишондод то 67,5 фоиз баланд бардошта шудааст. Айни замон таъминоти об на танҳо аз ҷиҳати миқдор, балки аз рӯйи сифат низ хеле беҳтар гаштааст.
Президенти кишвар зарурати дастгирии ҳамаҷонибаи чунин лоиҳаҳои бузурги энергетикӣ, технологӣ ва аз ҷиҳати иҷтимоӣ муҳимро таъкид кард. Ҳамчунин қайд намуд, ки истифодаи чунин таҷриба дар дигар минтақаҳои мамлакат низ аҳамияти калон дорад.
Аз ҷиҳати техникӣ яке аз дастовардҳои муҳими лоиҳа сохтмони 246 километр шабакаҳои магистралӣ ва дохилӣ мебошад. Муҳимтар аз ҳама, бо асосноккунии ҳисобҳои гидравликӣ имконияти расонидани об бо фишор бидуни истифодаи насосҳо фароҳам оварда шуд. Ин иқдом хароҷоти энергетикиро коҳиш дода, устувории низомро таъмин намудааст. Маҳз ба шарофати ин навоварӣ об имрӯз ба шаҳри Тирмиз ва марказҳои ноҳияҳои Ангор, Бандихон, Қизириқ, Шеробод ва Музработ расонида мешавад.
Дар натиҷаи ин ташаббус, имрӯз таъминоти об дар 223 маҳалла устувор шудааст. Сатҳи сахтии об тақрибан ду баробар кам гардид. Беҳтар шудани сифати об ба ҳифзи саломатии мардум ва зиёд шудани муҳлати хизмат кардани асбобҳои хонагӣ мусоидат мекунад.
Маркази иттилоотии ҷуғрофӣ, ки дар иншооти обгузаронии «Шимолӣ» таъсис ёфтааст, имконияти назорати низомро дар вақти воқеӣ фароҳам овард. Ҳоло чунин ҳолатҳо, ба мисли паст шудани фишор, садама ва талафоти об, дар чанд дақиқа муайян карда мешаванд.
Бо беҳтар шудани таъминоти об ниёз ба истифодаи зиёда аз 100 чоҳи об бартараф гардид, ки ин вазъи экологиро сабуктар мекунад.
Илова бар ин, дар натиҷаи татбиқи лоиҳа ҳамасола 18,4 миллион киловатт-соат нерӯи барқ сарфа мешавад, ки ба маблағи тақрибан 18,5 миллиард сӯм баробар аст. Пайваст кардани истеъмолкунандагон ба низоми биллинг шаффофияти ҳисобу китобро баланд бардошта, қарздориро коҳиш дод.
Яке аз ҷанбаҳои муҳими дигар — насби панелҳои офтобӣ дар масоҳати 10 гектар бо иқтидори умумии 6 418 киловатт-соат мебошад.
Дар ҳамин ҷо роҳбари давлат бо нишондиҳандаҳои гидроэнергетикии вилоят ва лоиҳаҳои оянда дар ин соҳа шинос шуд. Барои ҳалли босуръати масъалаҳои ҳанӯз ҳалнашудаи таъминоти об дар вилоят супоришҳо дода шуданд. Аз ҷумла, дастур дода шуд, ки насосҳои кӯҳна бо таҷҳизоти каммасраф иваз карда шуда, шабакаҳо нав карда шаванд.
