Дар ин бора нашрияи “Financial Times” 29 январ бо истинод ба маълумоти ширкати таҳлилии “Kpler” хабар дод.
Зикр мешавад, ки агар таъминоти нав набошад, Куба маҷбур мешавад дар истеъмоли сӯзишворӣ маҳдудиятҳои боз ҳам сахттарро ҷорӣ намояд. Ҳамзамон, қисми зиёди кишвар қариб ҳар рӯз аз қатъи неруи барқ ранҷ мекашад.
Соли ҷорӣ Куба танҳо як бор, 9 январ аз Мексика бор қабул кард – ҳамагӣ 84 900 баррел нафт. Ин ба 3000 баррел дар як рӯз баробар аст, дар ҳоле ки ҷазира дар соли 2025 аз ҳамаи таъминкунандагон ба ҳисоби миёна 37 000 баррел дар як рӯз нафт мегирифт. Ба андешаи таҳлилгарон, Куба нафтро бо тахфифҳои калон ё ҳатто ройгон мегирифт.
«Агар ба тақрибан 460 000 баррел захира, ки дар аввали сол буд, бори моҳи январро илова кунем, метавон гуфт, ки он барои 15–20 рӯз мерасад», — гуфт таҳлилгари “Kpler” Виктория Грабенвегер.
11 январ, ду рӯз пас аз фиристодани охирин бор аз Мексика ва як ҳафта баъд аз боздошти роҳбари Венесуэла Николас Мадуро аз ҷониби неруҳои ИМА, Трамп ваъда дод, ки «дигар ба Куба ҳеҷ гуна нафт намеравад».
«Агар дар ҳафтаҳои наздик борҳои нав нарасанд, онҳо ба бӯҳрони ҷиддӣ дучор мешаванд», — гуфт коршиноси Донишгоҳи Техаси ИМА оид ба нафт Хорхе Пинон.
27 январ Президенти Мексика Клаудия Шейнбаум инкор накард, ки кишвараш фиристодани борро, ки барои ҳамин моҳ пешбинӣ шуда буд, ба таъхир гузоштааст ва инро «қарори соҳибихтиёр» номид. Аммо рӯзи дигар вай гуфт, ки сухан дар бораи қатъи содирот набуд ва таъминоти нафт ба Куба дар асоси шартномаҳо бо “Pemex” ё ҳамчун кӯмаки башардӯстона амалӣ мешавад. Ба гуфтаи таҳлилгарон, агар Трамп барои ҷорӣ намудани муҳосираи пурраи баҳрӣ тасмим бигирад, Мексикаро эҳтимоли боздошти танкерҳояш бозмеистонад.
Моҳи декабри соли 2025 Венесуэла ба Куба ба ҳисоби миёна 46 500 баррел дар як рӯз нафт содир мекард, аммо баъд аз боздошти Мадуро дар санаи 3 январ, таъминот комилан қатъ шуд. Аз Венесуэла охирин бор сӯзишворӣ барои неругоҳҳои барқӣ моҳи ноябр расида буд. Русия ва Алҷазоир, ки пештар ба Куба нафт мерасониданд, инро мунтазам идома доданд. Охирин танкери Русия моҳи октябр ва танкери Алҷазоир моҳи феврали соли 2025 расида буд, хабар медиҳад korrespondent.net.
Иқтисоди ҷазира рӯ ба таназзул овардааст, гардиши сайёҳӣ ва истеҳсоли шакар коҳиш ёфтааст. Ба гуфтаи таҳлилгари “Teneo” Николас Вотсон, бӯҳрони иқтисодӣ метавонад режими Кубаро ба остонаи суқут расонад. Трамп қаблан гуфта буд, ки Куба «ба зудӣ пош мехӯрад» ва илова карда буд, ки «Онҳо аз Венесуэла пул мегирифтанд, нафт мегирифтанд, ҳоло бошад дигар ба ин дастрасӣ надоранд».
