Дар ҷараёни будубош дар ИМА, Сарвари кишварамон дар мубоҳисаҳои умумсиёсии иҷлосияи ҷашнии 80-уми Маҷмаи умумии СММ суханронӣ намуда, нақши СММ-ро ҳамчун минбари асосӣ барои ҳалли масъалаҳои муҳимтарини глобалӣ, инчунин ҷараёни ислоҳоти бозгаштнопазир дар Ӯзбекистони нав таъкид кард.
Роҳбари Ӯзбекистон як қатор пешниҳодҳо ва ташаббусҳоеро пеш гузошт, ки ба ҳалли масъалаҳои рӯзмарраи байналмилалӣ ва минтақавӣ, таъмини сулҳ ва рушди устувор равона шудаанд.
Ҳодисаи марказии сафар мулоқоти роҳбари Ӯзбекистон бо Президенти ИМА Доналд Трамп гардид. Сарварони ду кишвар дар бораи таҳкими минбаъдаи шарикии стратегии муносибатҳои Ӯзбекистон ва ИМА ва тавсеаи ҳамкориҳои амалӣ ба созиш расиданд.
Шавкат Мирзиёев ҳамчунин бо Дабири кулли СММ А. Гутерриш, Президенти Ҷумҳурии Корея Ли Чжэ Мён, Подшоҳи Урдун Абдуллоҳ II ибн ал-Ҳусайн, Президенти Ҷумҳурии Чех Петр Павел, Президенти Албания Байрам Бегай, инчунин бо директори иҷроияи СХШ Кристалина Георгиева, Президенти Гурӯҳи Бонки ҷаҳонӣ Аҷай Банга ва директори генералии Созмони ҷаҳонии савдо Нгози Оконджо-Ивеала мулоқотҳо баргузор намуд.
Президенти Ӯзбекистон фиристодаи махсуси Президенти ИМА оид ба Осиёи Ҷанубӣ ва Марказӣ Сержио Гор ва раиси «Кокуси ҳамкорӣ бо Ӯзбекистон» дар Конгресси ИМА, конгрессмен Трент Келлиро қабул кард.
Барномаи кории сафар низ ғанӣ буд. Роҳбари Ӯзбекистон бо иштироки доираҳои соҳибкории ИМА суҳбати «мизи мудаввар» баргузор намуда, бо роҳбарони як қатор ширкатҳо, корпоратсияҳо, фондҳои сармоягузорӣ ва муассисаҳои молиявии пешбар – Traxys, FLSmidth, McKinsey, Go Green Partners, Мактаби геологии Колорадо, BlackRock, Boeing Global, Franklin Templeton, Citigroup, Air Products, BNY, Jefferies, NASDAQ, Oppenheimer ва дигарон гуфтушунид анҷом дод.
Дар натиҷаи мулоқотҳо ва гуфтушунидҳо барномаи миёнамӯҳлати лоиҳаҳо таҳия гардид. Дар ҳузури Президенти Ҷумҳурии Ӯзбекистон ва фиристодаи махсуси Президенти ИМА Сержио Гор маросими мубодилаи шартномаҳои дуҷонибаи тиҷоратӣ ва созишномаҳои сармоягузорӣ, аз ҷумла дар соҳаҳои минералҳои муҳим, авиатсияи гражданӣ, саноати кимиё, энергетика ва дигар самтҳои афзалиятнок баргузор шуд.
Дар анҷоми сафар ба Иёлоти Муттаҳидаи Амрико Сарвари кишварамон анъанавӣ бо гурӯҳи ҳамватанон, ки дар ИМА кор ва зиндагӣ мекунанд, инчунин бо донишҷӯёни стипендияи Фонди «Эл-юрт умиди», ки дар донишгоҳҳои пешбари Амрико таҳсил мекунанд, мулоқот кард.
Пас аз анҷоми барномаҳои сафар Президенти Ҷумҳурии Ӯзбекистон Шавкат Мирзиёев ба шаҳри Тошканд баргашт.
