Ҷонибҳо масъалаҳои густариши минбаъдаи ҳамкории бисёрҷанбаи Ӯзбекистон ва Аврупоро дар доираи татбиқи созишномаҳое, ки дар анҷоми нахустин Саммити “Осиёи Марказӣ – Иттиҳоди Аврупо” моҳи апрели соли равон дар шаҳри Самарқанд ба даст омада буданд, баррасӣ карданд.
Раҳбарон Созишномаи таърихӣ дар бораи шарикӣ ва ҳамкории васеъро, ки имрӯз имзо шуд, баҳои баланд доданд. Таъкид гардид, ки ин ҳуҷҷати фарогир на танҳо пойгоҳи ҳуқуқии ҳамкории Ӯзбекистон ва Иттиҳоди Аврупоро тавсеа медиҳад, балки рӯзномаи нави ҳамкориро ташаккул мебахшад.
Инчунин, ин созишнома барои ҳамкорӣ бо кишварҳои узв, пеш аз ҳама дар соҳаҳои тиҷорат, сармоягузорӣ, нақлиёт, энергетика, иқлим, технологияҳои баланд ва ҳамкориҳои фарҳангиву гуманитарӣ суръат мебахшад.
Ҷонибҳо анҷом ёфтани музокироти дуҷониба байни Ӯзбекистон ва ИА оид ба узвият ба Созмони ҷаҳонии савдо (СҶС)-ро низ истиқбол карданд.
Дар ҳамаи сатҳҳо татбиқ гардидани мулоқот ва табодули фаъолу самарабахш бо қаноатмандии амиқ таъкид гардид. Дар арафаи сафар ҳайати Ӯзбекистон дар Форуми дуюми “Дарвозаи ҷаҳонӣ” иштирок намуд. Дирӯз бошад, ҷамъомадҳои Шӯрои ҳамкорӣ ва Кумитаи хурд оид ба иқтисод, савдо ва сармоягузорӣ бо муваффақият баргузор гардиданд.
Рӯзи гузашта Форуми бузурги муштараки тиҷоратӣ гузаронида шуда, имрӯз вохӯрӣ бо роҳбарони ширкат ва сохторҳои молиявии пешсафи Аврупо сурат гирифтанд. Дар натиҷа, ҷонибҳо дар бораи татбиқи лоиҳаҳои нав ба маблағи беш аз 10 миллиард евро дар соҳаҳои энергетика, кимиё, маъданҳои муҳим, логистика, нассоҷӣ ва дорусозӣ ба мувофиқа расиданд. Ин ба портфели кунунии лоиҳаҳо бо иштироки ширкатҳои Аврупо, ки беш аз 40 миллиард евро арзиш доранд, иловаи назаррас аст.
Барои нигоҳ доштани суръати баланди шарикӣ, зарурати таҳкими минбаъдаи механизмҳои институтсионалии ҳамкорӣ, татбиқи лоиҳаҳои нави ояндадор дар соҳаҳои сармоягузорӣ, маъданҳои муҳим, энергетика, нақлиёт, фан ва таълим таъкид шуд.
Барои тақвияти робитаҳои тиҷоратӣ ва гуманитарӣ муҳим будани содда кардани тартиботи раводид қайд гардид.
Раҳбарон дар бораи масъалаҳои муҳими рӯзномаи байналмилалӣ ва ҳамкориҳои минтақавӣ низ мубодилаи афкор карданд.
Дар поёни мулоқот Изҳороти муштарак қабул карда шуд.
