Бо Фармон мутобиқи банди 23-юми моддаи 109-уми Конститутсияи Ҷумҳурии Ӯзбекистон 522 нафар шахсоне, ки барои содир намудани ҷинояти содиркардаи худ ҷазоро адо намуда, аз кирдорашон самимона пушаймон шуда, ба роҳи ислоҳи қатъӣ гузаштаанд, афв карда шуданд.
Аз афвшудагон 159 нафар аз адои ҷазои асосӣ пурра, 303 нафар шартан аз адои ҷазо озод карда шуда, ҷазои нисбат ба 60 нафар таъиншуда бо ҷазои сабуктар иваз карда шуд.
Дар миёни афвшудагон 19 нафар шаҳрвандони кишварҳои хориҷӣ, 56 нафар занон, 25 нафар мардони аз 60-сола боло, 233 нафари то 30-сола (аз он ҷумла 1 нафар ноболиғ) ва 27 нафаре ҳастанд, ки дар созмонҳои мамнӯъ ширкат кардаанд.
Дар доираи татбиқи Фармон ба вазорату идораҳои масъул оид ба баргардонидани ашхоси афвшуда ба ҳалқаи оила ва наздиконашон, мусоидат ба мутобиқшавии иҷтимоӣ, ҷалб кардан ба меҳнати фоиданок, интихоби тарзи ҳаёти солим ва дар ҷомеа ишғол намудани ҷои сазовор супориш дода шуд.
