Ҳангоми таҳияи консепсия таҷрибаи бисёр кишварҳои наздик ва дур, ки иқтисодиёти шабона дар онҳо бомуваффақият инкишоф меёбад, омӯхта шуд.

Ҳуҷҷат 10 самтро дар бар мегирад, аз ҷумла: рушди минтақаҳои гастрономии шабонарӯзӣ, бозорҳои шабона, чорабиниҳои фарҳангӣ ва фароғатӣ, беҳбуд бахшидани инфрасохтори шаҳрӣ, рушди нақлиёти шабона ва ҷорӣ намудани технологияҳои муосир.

Пешниҳод мешавад, ки кӯчаҳо ва минтақаҳо бо реҷаи кории шабонарӯзӣ (24/7) таъсис дода шаванд. Ба ин минтақаҳо талаботи махсус пешниҳод мегардад, аз ҷумла: таъмини амният, равшаннамоии босифат, мавҷудияти таваққуфгоҳҳои муосир ва риояи шароити санитарӣ. Масъалаи идоракунии ин минтақаҳо тавассути ширкатҳои идоракунанда ҳал карда мешавад, ки онҳо барои расонидани хизматрасониҳои босифат ҷавобгар хоҳанд буд.

Ба ворид намудани вазифаи ҳамоҳангсоз оид ба масъалаҳои иқтисоди шабона диққати махсус дода шудааст. Ин шахс дар рушди ин самт нақши калидиро мебозад. Вазифаҳои асосии ӯ ҳамкорӣ бо намояндагони тиҷорат, ҳамоҳангсозии чорабиниҳо, назорат аз рӯи риояи стандартҳои сифат ва таъмини фаъолияти самараноки инфрасохторро дар бар мегиранд. Ин мавқеъ ҳамчун пул байни мақомоти давлатӣ, бахши хусусӣ ва ҷомеа амал хоҳад кард ва ба эҷоди шароити мусоид барои фаъолиятҳои иқтисодӣ дар шаб мусоидат хоҳад кард.

Илова бар ин, консепсия оғози платформаи рақамии «Шаҳри шабона»-ро ба назар мегирад, ки маълумот дар бораи хизматрасониҳои шабонарӯзӣ, чорабиниҳо, хатсайрҳои нақлиёти шабона ва дигар хизматрасониҳоро пешниҳод мекунад.