Дар солҳои охир содироти хизматрасониҳои сайёҳӣ дар кишвари мо 1,6 маротиба афзуда, ба 3 миллиарду 500 миллион доллар расидааст. Дар ин соҳа зиёда аз ду ҳазор соҳибкори нав ба фаъолият оғоз карданд. Соли гузашта бори аввал шумораи сайёҳони хориҷӣ аз 10 миллион нафар гузашт.
Дар минтақаҳо инфрасохтори сайёҳӣ ва хизматрасонӣ босуръат рушд меёбад. Дар 8 соли охир ба соҳа 6 миллиарду 500 миллион доллар сармоягузорӣ ҷалб гардида, 130 ҳазор ҷойи шабакаҳои меҳмонхона таъсис ёфтааст.
Имрӯз дар кишвар 20 деҳаи сайёҳӣ фаъолият мекунанд. Дар ноҳияи Паркент, дар қуллаи «Олтин бел», минтақаи нави байналмилалии лижаронии кӯҳӣ бунёд мешавад.
Дар ҳақиқат, бо дарназардошти ғаниии таърихӣ, фарҳангӣ ва табиии кишвари мо, шумораи сайёҳонро метавон боз 2–3 маротиба зиёд кард. Бо вуҷуди ин, дар баъзе минтақаҳо камбудиҳо вуҷуд доранд, аз ҷумла роҳҳо ва алоқаи нақлиётии номувофиқ буда, ҷойҳои фароғатӣ ва барномаҳои ҷолиби сайёҳӣ намерасанд.
Ба ҳамин муносибат дар маҷлис чораҳо оид ба ошкор намудани имкониятҳои маҳаллӣ, зиёд кардани шумораи самтҳои сайёҳӣ ва беҳтар намудани шароит барои сайёҳон муҳокима гардиданд.
Мисолан, қисми зиёди ҳудуди ноҳияи Сариосиёро кӯҳҳо ташкил медиҳанд, ки барои туризми зимистона иқтидори калон доранд. Дар он ҷо метавон лоиҳаҳоро ба маблағи 200 миллион доллар амалӣ намуд — сохтмони роҳи канатӣ, меҳмонхонаҳо, марказҳои савдо ва хизматрасонӣ. Ноҳияи Чортоқ низ бо табиати зебо ва чашмаҳои шифобахшаш маъруф аст.
Ба роҳбарони масъул супориш дода шуд, ки барномаи рушди 36 чунин ноҳия ва шаҳрро бо дарназардошти намудҳои гуногуни сайёҳӣ, аз қабили этно-, гастрономӣ, тиббӣ, экстремалӣ, фарҳангию таърихӣ, зиёратӣ, зимистона ва агросайёҳӣ таҳия намоянд.
Имрӯз имкониятҳои сайёҳии Ӯзбекистон дар шабакаҳои бонуфузи телевизионӣ, ба монанди BBC ва Euronews, инчунин дар беш аз 20 намоишгоҳи байналмилалӣ фаъолона таблиғ мешаванд. Тартиботи гирифтани раводид содда карда мешаванд ва ҳавопаймоҳои муосир харидорӣ мегарданд.
Дар ҷамъомад оид ба истифодаи ин имкониятҳо барои ҷалби сайёҳон аз бозорҳои ояндадор ва ба роҳ мондани парвозҳои мустақим супоришот дода шуданд.
Ҳоло Платформаи миллии ягонаи сайёҳӣ таҳия шуда истодааст. Ба он хидматрасониҳо барои гирифтани раводиди электронӣ ва харидани чиптаҳо пайваст карда мешаванд. Ҳамчунин, ба нақша гирифта шудааст, ки як корти ягонаи сайёҳӣ ҷорӣ карда шавад, ки дастрасӣ ба ҳама ёдгориҳои таърихиро фароҳам меорад.
Дар солҳои охир ба сайёҳии дохилӣ таваҷҷуҳи зиёд зоҳир мегардад, шумораи сайёҳони маҳаллӣ ба 23 миллион нафар расидааст. Аммо то ҳол бисёре аз сокинон ба минтақаҳои дигар сафар накардаанд.
Бо назардошти ин, як рӯзи истироҳати ҳар моҳ ҳамчун «рӯзи сафар бо оила ва ҳамкорон» эълон карда мешавад. Ба ғолибони озмунҳои ҷавонон таҳти унвони «Саёҳат дар Ӯзбекистон» роҳхатҳо супурда мешаванд.
Самти дигар — кор бо объектҳои мероси фарҳангист. Дар 4 соли охир 327 маҷмааи фарҳангӣ таъмиру бозсозӣ карда шудааст. Ҳоло боз 485 иншоот ниёз ба таъмир доранд.
Зикр шуд, ки ба ин раванд бояд бахши хусусӣ фаъолона ҷалб карда шавад ва лоиҳаҳои тиҷоратӣ амалӣ гарданд. Оид ба такмили механизми ба иҷора додани объектҳои мероси фарҳангӣ ва рақамисозии ҳисоби даромадҳо аз онҳо вазифаҳо гузошта шудаанд.
Мӯҳлати таҳсилоти олии соҳаи сайёҳӣ аз 4 то 3 сол кӯтоҳ карда шуда, низоми дуалӣ ҷорӣ гардидааст. Акнун ба нақша гирифта шудааст, ки таҷрибаомӯзӣ ва кори донишҷӯён дар хориҷи кишвар ташкил карда шавад.
Умуман, зикр гардид, ки ба туфайли чунин чораҳо имсол метавон 15 миллион сайёҳро ҷалб намуд ва содироти хидматрасониҳои сайёҳиро то 4 миллиард доллар расонд.
Мавзӯи дуюми маҷлис таҳлили лоиҳаҳои сармоягузорӣ буд, ки дар ҳамкорӣ бо кишварҳои хориҷӣ амалӣ мешаванд.
Танҳо дар семоҳаи аввали соли равон дар рафти сафари расмӣ ба Аморати Муттаҳидаи Араб, Малайзия, Кувайт ва Фаронса, оид ба 178 лоиҳа ба маблағи умумии 39 миллиард доллар мувофиқа ҳосил гардид. Дар ҳамоиши ахири Самарқанд Иттиҳоди Аврупо эълон кард, ки барои Осиёи Марказӣ 12 миллиард евро ҷудо мекунад.
Бо дарназардошти ин, дар соли 2025 ҷалби 42 миллиард доллар сармоягузориҳои хориҷӣ ба нақша гирифта шудааст. Амалисозии 81 лоиҳаи бузург ва зиёда аз 8 ҳазор лоиҳаҳои миёна ва хурд, инчунин ҷалби 2 миллиард доллар грант аз созмонҳои донорӣ ва 6 миллиард доллар тавассути бонкҳо пешбинӣ шудааст.
Дар ҷаласа имкониятҳои ҷалби сармоягузорӣ аз рӯи минтақаҳо ва кишварҳои ҳамкор таҳлил карда шуданд.
Масалан, дар ноҳияи Олтинсой, ки қаблан барои сармоягузорон ҷолиб набуд ва дар он ҷо роҳи оҳан ва шоҳроҳҳои асосӣ мавҷуд нестанд, се лоиҳаи бузург ба маблағи 100 миллион доллар амалӣ мешаванд. Дар ноҳияи Кӯшработ татбиқи ду лоиҳаи нав оид ба истихроҷ ва коркарди гранит ба маблағи умумии 75 миллион доллар оғоз ёфтааст. Таъкид гардид, ки агар муносибати дуруст ба роҳ монда шавад, чунин имкониятҳо дар ҳар як минтақа мавҷуданд.
Моҳи гузашта дар Лондон «Рӯзи сармоягузорони Ӯзбекистон» баргузор шуд, ки дар он созишномаҳо оид ба ҷалби 2 миллиарду 770 миллион доллар ба даст оварда шуданд. Зарурати баргузории чунин чорабиниҳо дар марказҳои калони ҷаҳонӣ, ба монанди Ню-Йорк, Сингапур, Гонконг, Дубай, Шанхай, Токио ва Истанбул қайд гардид.
Дар доираи барномаи васеи хусусигардонӣ, саҳмияҳои давлатӣ дар 49 корхона ба бозори байналмилалӣ бароварда мешаванд ва 15 корхонаи калони давлатӣ евробондҳо мебароранд. Ин тадбирҳо имконияти хуб барои ҷалби сармоягузориҳои хориҷӣ мебошанд.
Дар моҳи апрел дар Ҷиззах ва дар моҳи июн дар Тошканд форумҳои байналмилалии сармоягузорӣ баргузор хоҳанд шуд. Зарурати омодагии босифат ба пешниҳоди лоиҳаҳо ба сармоягузорон таъкид шуд.
Ба шарофати гузариш ба низоми нави ҳамкорӣ бо муассисаҳои молиявии байналмилалӣ, аз аввали сол 706 миллион доллар аз худ карда шудааст. Лоиҳаҳо дар соҳаҳои энергетикаи гармӣ, шабакаҳои барқи минтақавӣ, кишоварзӣ, инфрасохтори роҳу роҳи оҳан пешрафти назаррас доранд.
Ҳамзамон, ҳолатҳои иҷро нашудани саривақтии лоиҳаҳо ё таъхирҳои беасос низ ба мушоҳида мерасанд. Таъкид шуд, ки минбаъд ворид кардани тағйирот ба лоиҳаҳои тайёр танҳо бо баррасии Ҳукумат иҷозат дода мешавад ва корҳои иловагӣ танҳо баъди анҷоми пурраи лоиҳаи асосӣ ва бо истифода аз маблағҳои сарфашуда анҷом дода шаванд.
Ҳоло дар ҳамкорӣ бо муассисаҳои молиявии байналмилалӣ лоиҳаҳо ба маблағи 20 миллиард доллар дар соҳаҳои энергетика, нақлиёт, кишоварзӣ, хидматрасониҳои коммуналӣ ва иҷтимоӣ амалӣ шуда истодаанд. Имрӯз шарикони хориҷӣ ислоҳоти дар кишвар ҷараёндоштаро васеъ дастгирӣ мекунанд.
Масалан, намояндагони Бонки ҷаҳонӣ, Бонки аврупоии таҷдид ва рушд (БАТР), Бонки осиёии рушд, Оҷонси рушди Фаронса ва Бонки исломии рушд аз минтақаҳо боздид карданд ва оид ба маблағгузории лоиҳаҳо ба маблағи 1,5 миллиард доллар ба созиш расиданд.
Ба муовини Сарвазир супориш дода шуд, ки ин таҷрибаро ба дигар минтақаҳо паҳн намояд ва илова бар ин, лоиҳаҳоро ба маблағи ҳадди ақал 3 миллиард доллар таҳия кунад.
Дар ҷараёни ҷамъомад пешниҳодҳои вазирон, хокимон, сафирони хориҷӣ ва соҳибкорони соҳаи сайёҳӣ шунида шуданд.
