Бо рушди саноат ва соҳибкорӣ дар кишвар талабот ба майдонҳои истеҳсолии иловагӣ афзоиш меёбад. Минтақаи саноатие, ки бо фармони роҳбари давлат аз 20 марти соли ҷорӣ таъсис ёфтааст, чунин майдонҳоро барои корхонаҳои нав фароҳам меорад.
Ин маҷмаа, ки дар иқтисодиёти минтақа нақши муҳим хоҳад дошт, масоҳати 764 гектарро ишғол мекунад. Дар айни замон корҳои фаъол оид ба ташкили инфрасохтор идома доранд. Дар ин минтақа 47 лоиҳа бо арзиши умумии 1,375 миллиард доллар амалӣ карда мешаванд, ки дар соҳаҳое чун саноати хӯрокворӣ, истеҳсоли масолеҳи сохтмонӣ, маҳсулоти электротехникӣ, мошинсозӣ ва кимиё татбиқ мешаванд. Корхонаҳои мазкур 12 ҳазор ҷойҳои нави корӣ фароҳам хоҳанд овард.
Тавре Президент қайд кард, корхонаҳои минтақа бо ҳамкории брендҳои маъруфи ҷаҳонӣ фаъолият мекунанд. Дар байни онҳо ширкатҳои DP World, JAC Motors, Krantas, Acec Japan, East Can Solutions, EAS ва Evyap мебошанд, ки истеҳсоли маҳсулоти арзиши баланди иловашударо, ки ба содирот равона шудаанд, ба нақша гирифтаанд.
Ба Президент як қатор лоиҳаҳои дар минтақа татбиқшаванда муаррифӣ гардиданд.
Масалан, ширкати чинии CAMC Engineering идоракунии минтақа, ҷалби сармоягузорон ва рушди инфрасохторро ба ӯҳда дорад. Ширкати JAC Motors нақша дорад истеҳсоли нақлиёти тиҷоратиро роҳандозӣ кунад. Ин лоиҳа бо арзиши 135 миллион доллар 2 ҳазор ҷойҳои корӣ фароҳам меорад.
Якҷоя бо ширкати ҷопонии Acec Japan истеҳсоли мебелҳои офисӣ ва курсӣ ба роҳ монда мешавад. Арзиши ин лоиҳа 9 миллион долларро ташкил дода, барои 100 нафар ҷойҳои корӣ фароҳам меорад.
Ҳамкорӣ бо DP World аз Амороти Муттаҳидаи Араб ба ташкили маркази нақлиётӣ-логистикӣ равона шудааст.
Дар ҳудуди минтақа ташкили лабораторияҳо, марказҳои тадқиқотӣ, толорҳои конфронс ва маконҳои савдо ба нақша гирифта шудааст. Инчунин, омӯзиши дуалӣ ҷорӣ хоҳад шуд, ки дар он ҷо тайёр намудани мутахассисон барои корхонаҳои саноатӣ амалӣ карда мешавад.
— Дар солҳои охир ММД-и мо ду маротиба афзоиш ёфта, ба 110 миллиард доллар расид. Ҳоло мо ҳадаф дорем, ки ин нишондиҳандаро ба 200 миллиард доллар расонем. Бе фароҳам овардани тамоми шароитҳо барои сармоягузорон ва дастгирии пурраи лоиҳаҳо ба ин натиҷа наметавон расид. Тошканд бояд дар ин самт намуна шавад, — таъкид кард Президент.
Ба шахсони масъул супориш дода шуд, ки ба масъалаҳои маҳаллисозӣ, рақамисозӣ ва сарфаҷӯии энергия дар лоиҳаҳои татбиқшаванда таваҷҷуҳи хоса зоҳир намоянд.
