Давлатимиз раҳбари ўтган йил 13 декабрь куни пойтахтмиздаги 18-автобус саройида бўлиб, янги автобуслар олиб келиш ва йўловчиларга қулайликларни ошириш бўйича топшириқлар берган эди. Шундан келиб чиқиб, жорий йил 16 февралда Президентимизнинг “Жамоат транспорти тизимини ислоҳ қилиш чора-тадбирлари тўғрисида”ги қарори қабул қилинди. Апрель-май ойларида Тошкент шаҳрига 755 та замонавий автобус олиб келиниб, йўловчилари энг кўп йўналишларга қўйилди. Натижада автобусларнинг кунлик сони 1 минг 400 тага етган, 9 та қўшимча йўналиш очилган. Яқин кунларда яна 245 та автобус келтирилади. Эндиги вазифа йўлларда тирбандликни камайтириб, автобусларнинг эркин ҳаракатини таъминлаш. Тошкентда жамоат транспорти қамровини 2 миллион йўловчига етказишмақсад қилинган ва инфратузилма Бош режага асосан такомиллаштирилади. Вилоятларга ҳам янги автобусларни келтириш ва йўлларда шароитларни яхшилаш орқали мавжуд муаммолар ҳал этиб борилади.