Бұл заманауи спорт кешенінің іргетасы өткен жылдың 11 қарашасында Мемлекет басшысының қатысуымен қаланған болатын.
Қазіргі уақытта стадион құрылысы жоғары қарқынмен жүргізілуде. Атап айтқанда, жерді тегістеу жұмыстары толық аяқталған, іргетас құю жұмыстары 95 пайызға орындалған. Құрылыс алаңына металл конструкциялар кезең-кезеңімен жеткізіліп жатыр.
Айта кету керек, кейінгі жылдары елде футбол саласында түбегейлі өзгерістер жүзеге асты. Атап айтқанда, ұлттық чемпионат жүйесі реформаланып, балалар мен жасөспірімдер академиялары құрылды. Өңірлерде 75 ірі және 302 шағын стадион жұмыс істейді.
Белгілі болғандай, 2017 жылы республика аумағанда ФИФА және Азия футбол конфедерациясы талаптарына сай келетін небәрі 3 стадион болса, бүгінде олардың саны 10-нан асты.
Сонымен қатар, 1,5 мың мектептің футбол алаңдары жөндеуден өтіп, 1 миллионнан астам оқушы мен жастар қамтылды. Жастар арасында махалла, аудан, облыс және республика деңгейінде турнирлерді тұрақты өткізу жүйесі жолға қойылды.
Бұл бастамалар өз нәтижесін бере бастады.
Футболдан олимпиадалық құрам Париж Олимпиадасы ойындарына алғаш өнер көрсетті. Ал ұлттық құрама тарихта тұңғыш рет биыл өтетін әлем чемпионатына жолдама алды.
Өткен жылдың 2 қазанында ФИФА Кеңесінің отырысында 2027 жылы 20 жасқа дейінгі жасөспірімдер арасындағы әлем чемпионатын Өзбекстан мен Әзербайжанда өткізу туралы шешім қабылданды.
Бұл турнир аясындағы матчтар екі елдегі үш стадионда өтеді. Ал финал және жартылай финал ойындарын өткізу үшін сыйымдылығы 50 мыңнан асатын стадион болуы ФИФА талаптарының бірі болып табылады.
Осы тұрғыда Жаңа Ташкент стадионы – ел футболы үшін стратегиялық маңызы зор жоба. Құны 100 миллион доллар болатын бұл нысанның дәл осы аумақта салынуы бекер емес. Себебі Жаңа Ташкент болашақта елдің жаңа мүмкіндіктер мен озық идеялар орталығына айналмақ.
Стадион ФИФА талаптарына толық сәйкес салынып жатыр. Ол Азиядағы ең ірі әрі заманауи инфрақұрылымы бар футбол ареналарының біріне айналады.
Бұл нысан тек 2027 жылғы жастар арасындағы әлем чемпионатына ғана емес, жалпы өзбек футболының және жасөспірімдер спортының болашақ дамуына қызмет етпек.
Мемлекет басшысына құрылыс барысы туралы жан-жақты мәлімет берілді.
55 мың көрерменге арналған стадион 6 қабатты болады. Мұнда спортшыларға, жанкүйерлерге және бұқаралық ақпарат құралдары өкілдеріне барлық қажетті жағдай жасалады. Көрермендердің кіріп-шығуын жеңілдету үшін 10-нан астам эскалатор орнатылады. Сондай-ақ, аумақта қосымша 3 жаттығу алаңы салынады. Стадион маңында метро станциясы бой көтереді және 5 500 орындық автотұрақ қарастырылған.
Мемлекет басшысы мұндай ірі әрі жабық стадион елімізде алғаш рет салынып жатқанын атап өтіп, әрбір бөлшекке мұқият қарау қажеттігін айтты. Сонымен қатар, стадион айналасын абаттандыру жұмыстарын алдын ала жоспарлап, кезең-кезеңімен жүзеге асырудың маңыздылығын ерекше атап өтті.
