Көрмеге Өзбекстан Республикасы Қорғаныс өнеркәсібі агенттігі жүйесіндегі кәсіпорындар да қатысуда. Олар өз өнімдерін «Made in Uzbekistan» бірыңғай ұлттық брендімен таныстырып жатыр.

Өзбекстан  осы халықаралық көрмеге Орталық Азия елдері арасында тек өзі ғана қатысуда.

Қорғаныс өнеркәсібі агенттігі көрме аясында соңғы жылдары әзірленген инновациялық өнімдер мен түрлі бағыттағы жаңа әзірлемелерді ұсынуда.

Өзбекстанның ұлттық павильонында елде өндірілген қорғаныс өнімдері, соның ішінде оқ-дәрілер, жеке қорғаныс құралдары, әскери жабдықтар, авиациялық компоненттер, дрондар, сондай-ақ оларға қарсы күрес жүйелері қойылған.

Жергілікті өндіріс өнімдері халықаралық мамандар мен шетелдік делегациялардың, атап айтқанда, Африка құрлығы мемлекеттері өкілдерінің қызығушылығын тудырып отыр.

Көрмеде «Made in Uzbekistan» брендімен әскери және қос мақсатта пайдаланылатын өнімдерді таныстыру жергілікті қорғаныс өнеркәсіпорындарының экспорттық әлеуетін кеңейтуге, халықаралық ынтымақтастық байланыстарын нығайтуға және жаңа серіктестік бағыттарды дамытуға бағытталған.

Мәлімет үшін, екі жылда бір рет өткізілетін AAD 2026 көрмесіне әлемнің 30-дан астам елінен келген 350-ден астам жетекші компания қатысуда. Іс-шара аясында бизнес-форумдар мен авиашоу бағдарламасындағы демонстрациялық көрсетілімдер де ұйымдастырылған.

Өзбекстан делегациясы ұлттық өнімдерін көрме аяқталатын 20 қыркүйекке дейін таныстырады.