Маълум қилинишича, жорий йилнинг 28 апрель куни йўл-патруль хизмати ходимлари томонидан “Isuzu” русумли йўловчи ташувчи транспорт воситаси тўхтатиб текширилган. Текширув жараёнида ҳайдовчи маст ҳолда экани ва у мактабгача таълим ташкилотининг 40 нафар тарбияланувчисини ташиб кетаётгани аниқланган.

Шунингдек, ҳайдовчи ЙПХ ходимларининг қонуний талабларига ҳам бўйсунмаган.

Суд қарорига кўра, у Ўзбекистон Республикаси Маъмурий жавобгарлик тўғрисидаги кодексининг 131-моддаси биринчи қисми, 194-моддаси биринчи қисми ҳамда 128⁸-моддаси биринчи қисмида назарда тутилган ҳуқуқбузарликларни содир этган деб топилди.

Ҳайдовчига 3 йил муддатга барча турдаги автотранспорт воситаларини бошқариш ҳуқуқидан маҳрум қилиш ҳамда базавий ҳисоблаш миқдорининг 40 баравари — 16 миллион 480 минг сўм жарима жазоси тайинланди.

Ҳайдовчи судда қилмишидан пушаймон эканини билдириб, келгусида бундай ҳолатга йўл қўймасликка ваъда берган.

Мутасаддилар мазкур ҳолат орқали ота-оналарни фарзандлари хавфсизлигига бефарқ бўлмасликка чақирди. Қайд этилишича, маст ҳолда транспорт бошқариш инсон ҳаёти ва хавфсизлигига жиддий таҳдид солади.