Сенатнинг 18-ялпи мажлисида «Фуқароларнинг давлат пенсия таъминоти тўғрисида»ги Ўзбекистон Республикаси Қонунига пенсия тайинлаш тартибини янада такомиллаштиришга қаратилган ўзгартиришлар ва қўшимча киритиш ҳақида»ги қонун муҳокама қилинди.

Сўнгги йилларда мамлакатда пенсия тайинлаш тартибини соддалаштириш, соҳани рақамлаштириш орқали ортиқча бюрократик тўсиқларни бартараф этиш, пенсия таъминоти тизимида давлат хизматлари сифатини яхшилаш ва ижтимоий адолат тамойилларини мустаҳкамлашга қаратилган тизимли чора-тадбирлар амалга оширилмоқда.

Мазкур қонун ҳам ногиронлиги бўлган шахсларнинг пенсия соҳасидаги ҳуқуқ ва манфаатларини янада мустаҳкамлашга қаратилган.

Ҳужжатга кўра, фуқарога I ёки II гуруҳ ногиронлиги белгиланиши муносабати билан ногиронлик пенсиясини проактив шаклда тайинлаш тартиби жорий этилади. Яъни бунинг учун фуқаронинг алоҳида мурожаат қилиши талаб этилмайди.

Шунингдек, пенсия тайинланганидан кейин камида бир йил иш стажига эга бўлган фуқаронинг ногиронлик пенсияси ҳар икки йилда бир марта унинг мурожаатисиз, проактив шаклда қайта ҳисоблаб чиқилади.

Қонун билан пенсиядан чегирма қилинганидан кейин фуқарога тўланадиган пенсия миқдори энг кам истеъмол харажатлари миқдоридан кам бўлмаслиги ҳам белгиланмоқда.

Сенаторларнинг таъкидлашича, мазкур ўзгартишлар ногиронлик пенсиясини тайинлаш тартибини соддалаштириш, фуқароларнинг ортиқча оворагарчилигини камайтириш ва уларга пенсия соҳасида кўрсатилаётган давлат хизматлари сифатини янада оширишга хизмат қилади.

Муҳокама якунида сенаторлар қонунни маъқуллади.