Вазирлик матбуот хизмати маълумотига кўра, майор Ҳусниддин Шарапов бола чўкаётгани ҳақида ўғлидан эшитиб қолган.
Унинг сўзларига кўра, ишдан қайтиб уйига кирган пайтда катта ўғли югуриб келиб, дарёда бола чўкаётганини айтган. Шундан сўнг у зудлик билан воқеа жойига етиб борган.
Ҳусниддин Шарапов дарё бўйига етиб келганида икки бола ёрдам сўраб бақираётганини кўрган. У дастлаб велосипедни сувга ташлаб, чўкаётган болага илиниш имконини яратишга уринган. Аммо бола қаттиқ қўрқиб қолгани сабабли уни ушлай олмаган.
Шундан кейин ФВВ ходими ўзи сувга тушиб, болани қутқариб чиққан. У болани елкасига чиқариб соҳилга олиб чиққанини айтган.
Қутқарувдан сўнг бола уйига олиб борилиб, унга биринчи ёрдам кўрсатилган — иссиқ сув берилган, ювинтирилиб, адёлга ўралган. Шундан кейин у ота-онасига топширилган.
Қайд этилишича, майор Ҳусниддин Шараповнинг жасорати ва фидойилиги муносиб эътироф этилиб, вазир томонидан «Аъло хизматлари учун» кўкрак нишони билан тақдирланган.
