Маълум қилинишича, бир гуруҳ шахслар Ташқи меҳнат миграция агентлиги, хусусий бандлик агентликларининг собиқ мансабдорлари ва бошқалар билан уюшган ҳолда фуқароларни Кореяга ишга юборишни ваъда қилган.

Дастлабки маълумотларга кўра, жиноий гуруҳ 35 нафар фуқародан жами 263,5 минг АҚШ долларини ноқонуний равишда олган.

Тергов жараёнида Кореяга ишга юбориш учун расмий тўловлардан ташқари фуқаролардан фирибгарлик йўли билан 7 мингдан 12 минг АҚШ долларигача пул йиғилгани маълум бўлди.

Шунингдек, гуруҳ 230 нафар фуқарони Кореяга юбориш эвазига 580 минг доллар, Кореяга юборилган 1 минг нафар фуқародан эса ноқонуний тарзда 5,6 миллион доллар олгани аниқланган. Тергов маълумотларига кўра, умумий ноқонуний маблағлар миқдори 45 миллион АҚШ долларига етган.

Ҳозирда Кореяга юборилмаган 600 нафардан ортиқ фуқаронинг мурожаатлари ўрганилиб, етказилган зарар миқдори аниқланмоқда ва ундириш чоралари кўрилмоқда.

Мазкур ҳолат юзасидан жиноят иши қўзғатилган бўлиб, тергов ҳаракатлари давом этмоқда.

Бош прокуратура жабрланган фуқаролардан Департаментнинг 71-233-10-07 рақамли ишонч телефони орқали мурожаат қилишни сўради.