Давлат активларини бошқариш агентлиги MobiUzʼнинг 100 фоиз давлат улушини сотиш бўйича халқаро хусусийлаштириш жараёни якунлангани ва ғолиб инвестор аниқланганини маълум қилди.
Қайд этилишича, савдо жараёнларида АҚШ, Япония, Форс кўрфази мамлакатлари, Европа ва Кавказорти минтақаларидан 15 дан зиёд инвестор иштирок этди. Улардан 10 нафари дастлабки нарх таклифларини берган бўлса, 6 нафар иштирокчи компанияни сотиб олиш бўйича қатъий таклиф тақдим этди.
Якуний босқич натижаларига кўра, Давлат активлари агентлиги АҚШнинг «McKim and Company» компанияси бошчилигидаги молиявий инвесторлар ҳамда технологик ҳамкор «JVR Enterprises LLC» («JVR Capital Group») иштирокидаги консорциум таклифини ғолиб деб топди.
Ғолиб таклифга мувофиқ, MobiUz компанияси 351 миллион АҚШ долларига баҳоланган. Шунингдек, инвесторлар мамлакат телекоммуникация инфратузилмасини ривожлантириш учун 500 миллион АҚШ долларигача инвестиция киритишни режалаштирмоқда.
Маълум қилинишича, битимнинг EV/EBITDA мультипликатори 7,4 бараварни ташкил этган бўлиб, бу компаниянинг юқори бозор баҳосида сотилганини кўрсатади. Кўрсаткич мустақил баҳоловчилар томонидан аниқланган қийматдан ҳам юқори экани қайд этилди.
Битимни тўлиқ якунлаш учун тегишли давлат органларининг рухсатномаларини олиш ҳамда зарур корпоратив ва ҳуқуқий тартиб-таомилларни бажариш талаб этилади.
