Бу бўйича Навоий вилояти делегациясининг Жанубий Кореяга амалий ташрифи доирасида ҳамкорлик ҳужжати имзоланди.

Сеул шаҳрида Навоий вилояти ҳокими Нормат Турсунов бошчилигидаги делегация ва Корея Онлайн экспорт-импорт ассоциацияси вакиллари ўртасида музокаралар ўтказилди.

Ҳамкорликнинг асосий йўналишларидан бири Корея–Навоий трансчегаравий электрон савдо марказини ташкил этишдан иборат. Бу орқали корейс компанияларининг Ўзбекистон ва Марказий Осиё бозорларига чиқиши, шунингдек, Навоийда ишлаб чиқарилган маҳсулотларни Корея бозорига олиб кириш кўзда тутилмоқда.

Дастлаб корейс компаниялари маҳсулотларини Навоийга олиб кириб, онлайн савдо орқали маҳаллий бозорда талабни ўрганиши режалаштирилган. Талаб юқори бўлган маҳсулотларни кейинчалик вилоятда маҳаллийлаштириш ва Марказий Осиё давлатларига экспорт қилиш таклиф этилмоқда.

Ҳамкорликнинг устувор йўналишлари сифатида электроника ва электротехника, «ақлли уй» технологиялари, косметика ва маиший кимё, саноат ускуналари ва бутловчи қисмлар, кимё ҳамда полимер маҳсулотлари белгиланган.

Навоийнинг корейс бизнеси учун жозибадор жиҳатларидан бири — вилоятнинг транспорт-логистика имкониятларидир. Вилоятдан қуруқлик транспорти орқали 12 та давлат бозорига чиқиш мумкин. Бу мамлакатларда қарийб 632 миллион киши истиқомат қилади, уларнинг йиллик умумий импорт ҳажми 545 миллиард доллардан зиёд.

Форумда дастлаб 15–20 та корейс компаниясини танлаб, улар учун Ўзбекистон ва қўшни давлатлар бозорлари бўйича электрон каталог яратиш, Навоийда ягона омбор-фулфилмент ва намойиш марказини ташкил этиш таклиф қилинди. Кейин савдо натижаларига қараб 3–5 та компанияни Навоийда маҳаллийлаштириш режалаштирилмоқда.

Томонлар, шунингдек, қўшма ишчи гуруҳ тузиш ва бир ой ичида пилот лойиҳага жалб этиладиган дастлабки корейс компанияларини белгилаш бўйича келишиб олди.

Келишув амалга ошса, Навоий тадбиркорлари учун маҳсулотларни Жанубий Корея ва бошқа халқаро онлайн бозорларга тўғридан-тўғри олиб чиқиш имконияти кенгаяди.