Италия оммавий ахборот воситалари тарқатган маълумотларга кўра, 56 ёшли дипломат 2024 йил декабрь ойида Ўзбекистондаги Италия элчихонаси раҳбари сифатида фаолият бошлаганидан сўнг виза бўлими ишини шахсан назорат қила бошлаган. Шунингдек, у Россияда туғилган ва Италия фуқаролигига эга бўлган Татяна Таракановани виза жараёнларига жалб қилган.
Тергов маълумотларига кўра, улар Россия фуқароларига Шенген ҳудудига кириш учун узоқ муддатли туристик визаларни қонун талабларига зид равишда расмийлаштирган. Бунинг эвазига эса ҳар бир аризачидан 4 минг евродан 16 минг еврогача пул олингани айтилмоқда. Расмий консуллик йиғимлари эса одатда 45–60 евро атрофида бўлади.
Маълум қилинишича, схемада Москвада фаолият юритувчи бир нечта туристик агентликлар иштирок этган. Терговчиларнинг таъкидлашича, камида 95 нафар Россия фуқароси Ўзбекистонда яшаш ёки консулликка шахсан келиб мурожаат қилиш каби талабларсиз Италия визасини олган.
Жиноят иши 2025 йил июль ойида Италия ташқи ишлар вазирлиги инспекцияси ортидан бошланган. Текширув давомида кўплаб виза ҳужжатларида қонунбузилиш ҳолатлари аниқланган. Хусусан, текширилган 92 та ишнинг 81 тасида ариза берувчиларнинг элчихонага шахсан келганини тасдиқловчи маълумотлар бўлмаган.
Тергов доирасида дипломатнинг мулки ҳам ўрганилмоқда. Ҳозирча унинг тахминан 3 миллион евро миқдоридаги активлари текширилмоқда. Собиқ элчи бу маблағлар мерос орқали қўлга киритилганини айтган.
Италия молиявий полицияси ҳозирда 400 га яқин виза аризаси бўйича қўшимча текширувларни давом эттирмоқда.
