Поездда 586 та ўрин мавжуд бўлиб, жами 1154 нафаргача йўловчи ташиш имкониятига эга. Йўл ҳақи катталар учун 10 минг сўмгача, 10 ёшгача бўлган болалар учун эса 6,5 минг сўм этиб белгиланган.
Янги қатнов 2025 йил 27 январда қабул қилинган Президентнинг «Ўзбекистон Республикасининг транспорт-логистика тизимини янада ривожлантириш чора-тадбирлари тўғрисида»ги ПҚ-28-сон қарори асосида амалга оширилган лойиҳа доирасида йўлга қўйилди.
Лойиҳа доирасида «Байтқўрғон – Паркент» темир йўл линияси қурилди. Узунлиги 24 километр бўлган темир йўл тўлиқ электрлаштирилди. Шунингдек, 3 та темир-бетон кўприк, 1 та автомобиль йўл ўтказгичи, 76 та сув ўтказиш иншооти ҳамда 16 та автомобиль ва темир йўл кесишмаси барпо этилди.
Бундан ташқари, 50 ўринга мўлжалланган «Паркент» темир йўл бекати қурилди.
Қайд этилишича, янги темир йўл қатнови нафақат Паркент аҳолисининг Тошкент билан транспорт алоқасини яхшилайди, балки туманнинг сайёҳлик салоҳиятини оширишга ҳам хизмат қилади.
Транспорт инфратузилмасининг ривожланиши Паркентнинг сайёҳлар учун янада қулай манзилга айланиши, маҳаллий туризмни ривожлантириш ва янги иш ўринлари яратиш учун қўшимча имкониятлар очиши кутилмоқда.
Зулхумор Акбаров
